Texts
Return to list | edit | delete | Create a new | history | Statistics | ? Help
Jelena Filina. Lekar’ sures kirjamespäi
Jelena Filina
Lekar’ sures kirjamespäi
Veps
New written Veps
Kuz’mič ei
navedind jagadas ičeze problemoil .Konz hänen elos tegihe mi-se paha , hän starinoiči neciš jumoranke .Minä el’genzin , miše nece abuti hänele ei otta pahad pähä .El’genzin i ihastuin neche .
Kerdan Kuzmičal käden kibedaškanzi .Hän nimidä ei sanund lapsile , iče läksi lidnan poliklinikaha .
– Hüvin nügüd’ opetas lekarikš , tütär , – sanui hän minei tuldes poliklinikaspäi .
Minä rigehtin tedištada , mil-žo čudutoiti händast lekar’ .
– Tulen minä kabinetha , tütär , i nägen : ištub nor’ lekar’ , mugoine ülev , midä-se kirjutab .Hän sanui : "Tervhen , läžui ".Minä mugažo toivotin hänele tervhut ."Minke tulid , uk ?" – jatktab hän . Minä sel’genzoitan hänele : "Käden kibedaškanzi , leta om kibed .Nacein , satatin käden kolunal ".Lekar’ kacuhtab minuhu tarkašti i küzub : "A äjak vot teile om ?"Minä sanun toden vastha , ved' minun edes ei ole neižne : " Ka täudui jo 84 vot , lekar’ ".A hän čududelden küzub udes : "Ik 84?".I sid’-žo sanub : "Nu a midä tö tahtoid ?Teile om 84 vot , a ei 18.Mängat aptekaha , se meil om ezmäižel žirul .I ostkat voiže ".Muga sanui-ki laskvas – vo-oi-že .Eskai receptad ei kirjutand .Minä händast en ehtind spasiboita siš , miše hän mindai aptekaha oigenzi , kut hän teravaidešti šlibahtoiti mindai pertedesehe .Näged , tütär , nügüdläižiden lekariden openduz om korktal tasol .Nügüd’ hö mahtaba kacta ristituiš läbi .Uzi tehtas sil’mil .Naku kut , armaz , muhaten starinoiči uk ozatoman vizitan polhe hirurgannoks .
Edeleze sanun , miše lapsed veiba Kuz’mičad maksuližehe klinikaha , kus sanutihe , miše hänel om käden mučkaiduz .Nacein , hän tozi satadi käden rates kirvhenke .Ani nece azj johtuti hänele parahimas lekariš , kudamb eli meiden agjas .
– Tedad-ik , mikš ende ristitud muhaziba , pajonke eliba ? Jüged elo oli , a hö muhaziba ?Eletihe muga sikš , ku enamba rahvast eli oikti .I ratihe hüvin .Lapsid penespäi opetihe erazvuččile radoile .A völ sikš , miše sapkoidenomblijal oli tat , kudamb oli sapkoidenomblijan , i hänen pradedoi mugažo oli sapkoidenomblijan .Sepäl oli poig sep i vunuk radoi pajs .I kaikutte , ken radoi , tezi , miše hänen heimos kaik oliba hüväd radnikad ,kudambad saiba kanzan mastaruden peitusid maman maidonke .Sikši i ratihe hüvin , varaitihe tehta pahad kanzale .
I meiden agjas oli mugoine lekar’ R .Lekar’ sures kirjamespäi .Hän oli lekariden dinastijaspäi .Voinal oli sanitaran , ühtni Staliningradan toraha .Hän ičeze käzil lendi läžundkodin jäl’ges voinad rajonan keskuses .Läžujid pidi hän hüvin kut ičeze lapsid .I kaiken aigan hän lugi , openzihe .Oli lujas melekahan ,navedi pajatada , akkordional mahtoi čomin väta .Paksus ezini koncertoil , kuti todesine artist .Hän oli lujas hüvän mehen ,abuti kaikuččele ristitule , ei kacund heiden arvnimihe .Kaiken toden sanui , oikti eli-ki .
A miččen hän oli vastusenpidäjan ristitun !Lekarin vahvas sanaspäi nikonz ei otstupind .Tegi kaiken , mi oli hänen väges , miše läžui tervehtuiži .Eli toižiden ristituiden täht .Händast hüvin tedihe kaikes agjas .Miše putta hänennoks visitale , rahvast ajoi sadas kilometraspäi .Minä ka iče en tundend händast , en olend hänen läžujan-ki .A eloazjan , mitte om sidotud lekarinke R , muštan hüvin .Kulištin sen polhe ičein tädilpäi , hän oli necen istorijan todištajan .
Edahaižes vepsläižes küläs , mitte oli 150 kilometras lidnaspäi , nor’ neižne sünduti last .Löumad rodinad oliba .Nor’ lekar’ el’genzi , miše iče hän ei voind sündutada , pidab tehta leikatuz , soiti rajonan läžundkodihe .Abuhu läksi iče lekar’ R .Naku mitte vihmasine sä dorogas ozaižihe , mugoine harvoin oleskeleb .Libui todesine torok , miččehe putui lekar' .Valeg , döl mugoine puhui , eski pud mahasai kumarzihe .Dorog langeni , se meiden agjoiš savesine oli .Mašin tartui .Lekar’ R jaugai läksi lähembaižennoks külännoks .Sigä kolhozan pämez’ andoi hänele hebon .I jälgmäšt 50 kilometrad hän ajoi raccil hebol sündutajannoks naižennoks .A siloi , sanun sinei , lekar’ oli jo vanh .Miččes-se küläs , kus hän seižutihe vähäižeks aigaks , vanh akine pani hänen hardjoile ičeze dedan kedespäi ombeltud pövun .
A nügüd’ kuvitele , tütär !Külä .Pimed om hot’ sil’mäd puske .Läz kaik , ked kerazihe sündutajan pert’he , habi jaugoil pidäse .Hänen mužik jumalaižen al loičeb .A norel enamba ei ole väged kidastada , vižaidab , činktab , kuti kužuine .Medsizar rindal seižub , ozatoman ocalpäi higod pühkib .Tädid pagištoitaba läžujad , pädme silitaba , a iče kündled ezipaikal pühkiba .Toižen päivän mokičese neižne .
A iknan taga torok völ lujemba tegihe , döl puid juridenke ratkaidab , samaldab muga , miše sil’mäd čapab , jumalanjuru azegil iškeb .Necil aigal avaidase uks’ jurunke i südäimehe tuleb ken-se sur’ i karvakaz .Kämnil kut lopotaškab da kut kidastaškandeb kaikehe kurkuhu : "Nece ken sid’ minuta ei voi sündutada ?"Neižne kidastaškanzi hoikal änel pit’kha pöl’gätusespäi i sid’-žo sünduti lapsen .
Holduškanziba kaik , jokseškanziba .Mužik än’he ilospäi räväidaškanzi .Lekar’ R . libui , oti vagahaižen lapsen , iški prihaižen kuna pidab , varasti kuni laps’ voikaškandeb i muhunke andoi händast medsizarele .A iče tuli kacmaha neidišt .Kacui hänehe i sanui , miše sündutab hän völ kümne last ,a iče rohkahti lavale .
Sutkad magazi lekar’ .Vaiše kerdan heraštui , küzui medsizarel midä-se tundmatomal kelel , muhazi kulištades vastust i udes unehe lanksi .
Miše kittä lekarid , kaikel küläl gostincoid kerazihe .Ken munid toi , ken – verest rahtod , ken – muraškod .Lekar’ kaburdelihe kaikile , a lahjoid pakiči neižen pert’he veda ."Sögaha mam , – sanub , – da vahvdugaha ! Da enamb algha pöl’gästugoi ,ika muga sündutada-ki voib ".Šuti lekar’ i läksi tagaze läžundkodihe kaičemha toižid eloid .
Radoi hän lujas hätken ičeze sijal , kuni hänele ei täudnu 90 vot .I minä meletan , tütär , hän jäti äi openikoid-lekarid ičeze jäl’ghe .Hän äjile ristituile ičeze ozutesel ozuti elonten .
Kus-se ved’ radaba mugoižed lekarid hüvän südäimenke . I ei eckoi hö surid dengoid , hö abutaba läžujile kucmusen mödhe anttes heile ičeze hengen lämäd da hüvüt .Hö andaba vastusid ičeleze jügedoihe küzundoihe johtutades ičeze vanhad lekarid-opendajad .Rahvaz navedib händast , kitäb .I kaikuččen päivän hö paneba päle vauktoid halatoid i mäneba kaičemha ei vaiše meiden hibjid , no hengid-ki lekarin muštoks – Lekarin sures kirjamespäi .
Lekar’ sures kirjamespäi
Veps
New written Veps