Texts
Return to list | edit | delete | Create a new | history | Statistics | ? Help
Jetojev Vladimir . Vladimir Jetojev
Jetojev Vladimir
Vladimir Jetojev
Veps
New written Veps
Meiden
kanzan täht Šimjärv’ ei ole vaiše čokim Vologdan agjan kartal , nece om edahaižen röunan eläb heng , meiden ezitatoiden kätte , sija , kus voz’sadoiden peitused kaičese süväs vedes .Mö olem sündnuded Šimjärven röunas , neniš kadonuziš küliš , miččiden nimid nügüd’ voib löuta vanhoil kartoil .
Ezmäine matk Šimjärvennoks oli tehtud äjak-se vot tagaze .Siloi se jäti äi hüvid tundmusid , no ei avaidand lophusai necen čudokahan sijan peitusid .Sem’on - da Kat’a-vunukad oliba pened , mected oliba tundmatomad , mö saimoiš sijannoks , no meil oli taht pörttas tänna udes .Lopuks tuli se aig – voden 2025 eloku , – konz meiden uništuz kucui meid matkaha .
Naku pen’ , no lujas üks’meline jouk läksi matkaha muretud mectedme endevanhan Nemž-külän kal’t .
Meil oliba sel’ktad tegendad .Tahtoim ičemoi sil’mil nägištada legendarišt järved – Mustad haudad – seičemed suomalaiž-ugrilaižen mirun čudokast azjad , kut udessündutadas unikaližid kul’turmuštpachid .Ned oma pu - da kivipühäkodid , miččed voz’sadoid seižuiba hormheinän pöudoiden keskes .Mugažo tahtoim pagišta sijaližiden sijoiden mušton kaičijoidenke .
Päazjan oli se , miše mö kucuim matkaha vepsläižid tedomehid – Nina Zaicevad da Zinaida Strogalščikovad .Heiden ühtnend tegi matkaspäi todesižen tedoekspedicijan .Programm oli täuz’ i lujas melentartuine : oli kirjan prezentacii , ekskursii Vidlan Vepsän fol’klorkeskusehe da Järved-külädme , kus konz-se radoiba ekspedicijoiš meiden arvokahad adivod .
Mö olim "Vepsän kond " -vepsläižes pertiš , mel’nical , časoun’as .Nina Zaiceva lahjoiči meile ičeze "Minun vespläine oza " -kirjan .Mö hüviš meliš oleskelim Sarjärves , Ilja Prorokan sarel – neciš spasib Al’ona Švedovale .Ühtes paštoim kalitoid .Oli äi melentartuižid paginoid – časuil voib kundelta neniden čudokahiden naižiden starinoid i čukloutas meiden rahvahan istorijaha .
Nece ajeluz oli enamb , mi matk .Meiden uništuz tuli eloho , mö olim maman-man süliš .Se maniti meid ezitatoiden änil .
Tahtoin spasiboita kaikid , ked ühtniba neche matkaha , aigvoččid i norid – Ol’ga da Vlad N’umanoid , Kat’a Molčanovad , Al’ona Pozdn’akovad .Vaiše ühtes , anttes tedoid sugupol’vespäi toižhe , mö voim kaita meiden jäl’gestust .
Šimjärv’ om vägen sija .Järv’ , mitte erašti lähteb ottes kerdale vet da kaloid , a möhemba pördutab niid tagaze .Georgii Pobedonoscan pühäkodi , mitte oli saudud dubaspäi vodel 1800 i nügüdehesai seižub .Znamenskaja kivipühäkodi hilläšti mureneb , no kaiken-se völ ihastoitab meid .
Nece om ma , kuna jäti ičeze jäl’gid koume suomalaiž-ugrilašt rahvahad : mer’a-rahvaz andoi järvele nimen "Šim " (must , rozmekaz ), loparid nimitiba saren "N’or ", a vepsläižed jätiba eriladušt mikrotoponimikad i muštod ičeladuižes kul’turas , mitte kadoi küliden sauptamižen aigan .
Tämbei surišpäi külišpäi jäiba vaiše hormheinäl kazvatadud pöudod .No necen tahon heng om eläb .Se om lehtesiden šobaiduses saril , mustas vedes , mitte kaičeb meiden ezitatoiden modoiden kuvahaižid , tedomehiden starinoiš i hillüdes , mitte muštab männuziden sugupol’viden änid .
Mö läksim , i hengel oli hüvä – mö olem tehnuded ičemoi velgusen , i kitäm necidä mad .Nece matk todišti : kuni mö muštam , kuni meile om melentartušt , kuni mö ajelem kodisijoidme – aigoiden sido ei kado .I mö pördamoiš tänna udes .
Vladimir Jetojev
Veps
New written Veps