Texts
Return to list | edit | delete | Create a new | Statistics | ? Help
Olʾga Smotrova. Giidua Karjalah liženöy joga vuottu
Olʾga Smotrova
Giidua Karjalah liženöy joga vuottu
Livvi
New written Livvic
Giidoin-ekskursienvedäjien kursit
algavuttih Petroskois .
Tänä vuon eri uudizis oli tieduo , ku Karjalas on ekskursienvedäjien hädä .Sen ližäkse nygöi joga giidal pidäy piästä vältämättömäs attestatsies läbi .Ilmai sidä dokumentua ristikanzal ei ole oigevustu vediä ekskursieloi .
Petroskois giidoi-ekskursienvedäjien kursiloi tariččou nelli laitostu : Petroskoin valdivonyliopisto , InturLider - da Lukomorje-turoperuattorat da Rahvahallizen talovuon da valdivopalvelun Ven’an akadeemii .
Tänä vuon himoniekkua suaja ekskursienvedäjän tovestus on äijy .Ezimerkikse , mennyt vuon "InturLideran " kursit loppi 40 hengie , tänä vuon kursiloih ilmoittihes 58 hengie .
– Suurin vuitti kursuniekois ollah tavan mugah opastajii . Kezä on turistoin aigu , opastajil kezäl on loma , voibi ruadua ekskursienvedäjänny .Äijy tulou buuhgalterii , bankan ruadajua , kudamat tahtotah muuttua oman ruadoalan .Tänä vuon kursal on opastajii , tehniekkuammattiloih opastunnuttu , lehtimiehii , on kai hammasliäkärigi , sanou "InturLideran " kursiloin järjestäi Jelena Žirina .
Jelena Žirinan sanoin mugah ekskursienvedäjii ei tävvy turistuaigah , ezimerkikse , kezäl Petroskoih Onieganjärvie myöte voibi tulla kerras kolme teplohoudua turistua , läs tuhattu hengie , vie ei tävvy giidoi talvel , konzu Karjal on čoma .
– Giidan opastuskursah kuuluu luvendoloi , muzeiloih da ekskursieloih linnua myöte käyndöi , seminuaroi , praktiekkoi , ajeluksii Petroskoin lähäzih turistukohtih da , tiettäväine , tutkindot . Tutkindolois tarkastetah urokoin aigah suaduloi tiedoloi , vie tulou valmistua oma ekskursii da ezittiä se .Tovestuksen suaduu jo pidäy ilmoittuakseh attestatsieh .Programmu on ylen mieldykiinnittäi da rikas , enzimäzel luvendol saimmo syvembiä tieduo Petroskoin histouries .Opastus maksau kolmekymmen tuhattu rubl’ua , kai ekskursiet jo kuulutah hindah , sanou kursuniekku Ol’ga .
Jelena Žirina mainiččou , ku kursat on vaiku pieni aluskivi giidan ammatis .Ei kerras kursiloin loppiettuu voibi ruadua suurien rahvasjoukkoloin kel .Pidäy ezmäi vediä ekskursieloi omile dovarišoile , omahizile , pienile joukkoloile , suaja neruo .Ainos pidäy ičeväil suaja uuzii tiedoloi , lugie kniigoi .Giidu opastuu kogo ruadotaibalehen .
Giidua Karjalah liženöy joga vuottu
Livvi
New written Livvic