Texts
Return to list | edit | delete | Create a new | Statistics | ? Help
Jelena Ruppijeva. Täs suat hengele hoivan
Jelena Ruppijeva
Täs suat hengele hoivan
Livvi
New written Livvic
Priäžän
Etnokul’tuurukeskukses jo tostu vuottu ruadau karjalankieline paginkluubu .Sih tarattamah omal kielel kävyy kymmeniene inehmisty .
Priäžäläzet inehmizet yhteh iäneh sanotah , ku paginkluubas olles moine hyvä on mieles , kai hengele hoivembi rodieu .Se rodieu sendäh , ku voijah paista omal karjalan kielel .Sidä tänäpäi harvah puuttuu ruadua .Enimil kluubah kävyjis kois ei ole kenenke tarattua livvikse , kieli vähin vähäzin rubieu unohtumah , sendäh ruvettihgi kerävymäh yhteh , konzu rodih moine mahto .
Paginkluubu karjalan kielel Priäžän kyläh on suadu sygyzyl vuvvennu 2018.Sen ruavon alguhpanijannu da vedäjänny on Karjalan Rahvahan Liiton Priäžän alaozaston johtai Lidija Tursunova .Alalleh priäžäläzeh paginkluubah kävyy kaheksa - kymmene hengie , kai ollah inehmizet .Toizet , a kluubah kirjuttihes vähästy enämbi kymmendy hengie , kävyksendelläh silloi toiči .
Jogahizel paginkluubah kävyjäl ollah karjalazet juuret da jogahizele heis karjalan kieli on muamankieli , lapsennu kuultu da opastuttu .Kai inehmizet ollah Priäžän čuppuu .Kengo on rodužin Heččulaspäi , kengo Kinnermäspäi , kengo Lamminsellälpäi , kengo Jyrgiläspäi .Priäžäh mendih miehele libo tuldih ruavon eččoh .
– Minuu tänne puašitti Ol’ga Mihailovna Lomujeva . Tulin enzimäzele vastavuksele , muga miellyin , ga ainos rubein käymäh .Myö konzu midä ruammo , konzu pajatammo , konzu midä bärbätämmö , sanelou Kinnermäh rodivunnuh Tatjana Prokopjeva .
Pagizemah omal kielel priäžäläzet inehmizet kerrytäh kaksi kerdua kuus , nygöi enzimäzenny da kolmandennu pyhänpiän .Joga kerdua paginkluuban vedäi Lidija Тursunova tariččou mittumantahto teeman kačottavakse libo kuččuu kedätah gostih paginkanzakse .Tänä opastusvuon , konzu kezän jälles uvvessah ruvettih kerävymäh yhteh , Muamanpäiviä vaste paginale otettih muamoloin ozua , uvven vuvven kynnyksel paistih Uvven Vuvven pruazniekas da Synnynmuanaijas .Kanzoinvälizen muamankielen päiviä enne varustettihes sih .Sit omal joukol käydih Oma sana pidoh .Se piettih Priäžän etnokul’tuurukeskukses Kanzoinvälizenny muamankielen päivänny 21. tuhukuudu .Kengo lugi mustoh juumorukerdomuksii , kengo runoloi karjalan kielel .
– Nygöi on jäijiä parembi paista , migu minä zavodin kävvä . Muga unohtin .Hos školah lähtin ni yhty sanua en maltanuh ven’akse .Unohtuu kieli .Ellendän kai , a sanat unohtan .Sendäh täs juohattelemmo , pagizemmo , nagrammo , pajatammo , sanou Lamminsellälpäi rodužin olii Tatjana Korz’uk .
Ga pertis naizet ei istuta ainos , lauččua , kui sanotah karjalazet , ei paineta .Kävväh konzu kunne .Jo oldih Priäžän monis muzeilois , ajeltih Kanzallizeh teatrah kaččomah spektaklii karjalan kielel .Mennyön opastusvuvven lopus vie juohateltih , kui pidäy pastua karjalazii piirualoi .Pastettih ynnällizen pinon .Sit mielihyväl yhtes juodih čuajuu iččeh pastettuloin magieloin keitinpiirualoinke , šipainiekoinke da sul’činoinke .
On priäžäläzes paginkluubas karjalan kielen varzinastu opastustugi .Imehmizet opastutah lugemah da kirjuttamah omal kielel , tiijustetah uuzii sanoi , vahnoi da jälgiaigua kieleh suaduloi .
Mulloi varustettihes karjalankielizeh saneluh , kudai piettih karjalan da vepsän kirjukielen päivän hantuzis , dai käydih kirjuttamah sidä .
– Emmo maltanuh kirjuttua , sanottih ei ole kirjukieldy , nygöi rubeimmo kirjuttamah , vie ei muga hyvin , kui himoittau , ga opastummo . Himoittau .Minä suvaičen paista omal kielel , sanelou Tatjana Korz’uk .
Nägyy , kui vačču ylen äijäl palau karjalan kieleh kaikil paginkluuban inehmizil .Se on uvvessah ottanuh heidy omih valdoih .Sendäh kerävytähgi yhteh paginkluubas , kävväh pajattamah karjalan kielel paikallizeh Randaine-joukkoh da ollah aktiivizet karjalazii koskijois pidolois omas kyläs .
Täs suat hengele hoivan
Livvi
New written Livvic