Texts
Return to list | edit | delete | Create a new | Statistics | ? Help
Darja Hil’. Karjalan Kelen, literaturan da istorijan institutale — 95 vot!
Darja Hil’
Karjalan Kelen, literaturan da istorijan institutale — 95 vot!
Veps
New written Veps
28. redukud
2025 Venäman tedoakademijan Karjalan tedokeskusen konferenc-zalas mäni praznikaline Tedomehiden nevondišton ištund . Se oli omištadud Kelen , literaturan da istorijan institutan 95-voččele jubilejale .
Ištundan programmaha mülüi äi melentartušt .Ezmäi istoriitedomez’ Jelena Dubrovskaja ezini kundlijoiden edes dokladanke enččes Institutan pämehes Maria Nikolajevna Vlasovas da hänen socialižes i professionaližes elos .Sen jäl’ghe Venäman tedoakademijan ühtnik-korrespondent Irma Mullonen starinoiči uden "Studia Nordica " - elektronižen tedožurnalan polhe .
— Nügüd’ meile om tärged se , miše uz’ žurnal tehtas istorijaližiden da filologižiden tedoiden ezitajiden ühthižradoks . Nece om ani sur’ sabustuz , sikš ku tedomirus nene tehomehed radaba ani erazvuiččiš poliš , miččed paksus ei sidogoi toine toižehe : heil om konferencijoid , hö kirjutaba tedožurnaloihe da lugeba tedokirjoid , no kaik se koskeb vaiše heiden tedopol’t .Toivom , miše uz’ žurnal ühtenzoitab tedomehid erazvuiččiš polišpäi .Mugažo "Studia Nordica " om oigetud noriden specialistoiden kazvatusehe , mö varastam noriden tedo-oppijoiden kirjutesid .Žurnalan toimitajad da arvostelijad kaiken oma vaumhed abutada , paremboita materialoid , — sanui Irma Mullonen .
Ištundan lopus adivoil oli voimuz kacta "Territorija Kul’turi " -programman ezmäižen vipuskan , mitte om omištadud Institutan 95-voččele jubilejale .
Praznikehtal kului äi čomid , lämid sanoid .Kelen , literaturan da istorijan institutan radnikoid ozateliba rahvahaližen da regionaližen politikan ministerstvan , Karjalan tedokeskusen , rahvahaližen kirjišton , Petroskoin universitetan , konservatorijan , rahvahaližen muzejan da Pohjoižen veziproblemoiden institutan ezitajad .
— Om mugoine muštatiž — "Kaik mäneb muzejaha ", no sanuižin toižin : "Om se-ki , mi muzejaspäi lähteb ". Institut om mugoine — se om sündunu meiden muzejas da sid’ sišpäi läksi .Vodel 1928 Karjalan kodirandan muzejan pämeheks tegihe vepsläine etnolog , sur’ tedomez’ Stepan Andrejevič Makarjev , kudamban vodel 1931 Edvard G’ulling tegi Karjalan tedo - oppindinstitutan varapämeheks .No Stepan Makarjev oli todesižen pämehen , necen tedomehen panend Istitutan kehitoitandaha oli ani sur’ .Karjalan rahvahaližel muzejal da Institutal kaiken oli ühthižid azjoid da projektoid , se om lujas arvokast meiden valdkundan täht , — sanui rahvahaližen muzejan pämez’ Mihail Gol’denberg .
Ozatelendsanoidenke tuliba mugažo adivod R’azanin universitetaspäi .Äivoččes satusekahas ühthižrados Institutad spasiboiči "Periodika "- painišton radnikad-ki .
Kelen , literaturan da istorijan institutan pämez’ Irina Petrovna Novak starinoiči sen uziš projektoiš , tulijoiš kirjoiš da tedoradnikoiden tedosabustusiš .Institutan edes om äi melentartuižid oppindoid , vastusid da tundištoitusid .
— Läz voz’sadan aigan meiden Institut om sanu surid satusid Karjalan rahvahiden keliden da kul’turiden , a mugažo kogonaižen regionan istorijan oppimižes . Institutan radnikoiden pämelentartusen om kaiken olnu süvid tedo-oppindoid .(...) Nügüd’ pidäm vastust siš , miše čomin zavodida tošt voz’sadad da jatkta sidä , mihe paniba augon meiden tetabad edeltajad , — sanui Irina Novak .
Venäman tedoakademijan Karjalan tedokeskusen Kelen , literaturan da istorijan institut om Karjalan kaikid vanhemb tedo-oppindorganizacii .Karjalas se om üksjaine gumanitarižen polen akademine institut .Nügüd’ Institutaha mülüb kuz’ erištod : arheologijan , istorijan , fol’kloristikan i literaturtedon , etnologijan , kel’tedon sektorad da tedopolidenkeskeine "Nordica "-tedo-openduzkeskuz .
Karjalan Kelen, literaturan da istorijan institutale — 95 vot!
Veps
New written Veps