Texts
Return to list | edit | delete | Create a new | Statistics | ? Help
Kut pedran poigaine sebranikan löuzi
Kut pedran poigaine sebranikan löuzi
Veps
New written Veps
Eli
konz-se tundras penidenke sarvidenke .Ni üht sebranikad sil ei olend .No pedraine lujas tahtoi , miše sil oližiba hüväd sebranikad .
Kerdan nӓgišti se varišan .Ištui variš surel kivel – must , sur’kulu , sil’mӓd saupsi , nikenehe ei kacund .Tuli pedran poigaine kivennoks i sanui hilläs :
– Variš , variš !
Variš ištub vaiknašti .
Völ kerdan kucui pedran poigaine :
– Variš , variš !
Variš vaiše sil’mӓd avaiži , no ei andand vastust .
Komedas kucui pedran poigaine :
– Variš , variš !
Kacuhti variš , nägišti pedran poigaižen i avaiži nökun :
– Midä tahtoid ?
– Tahtoin sebrastada sinunke , variš !
Kulišti mugoižid sanoid variš , krongaškanzi , nökul plokaiži .Pit’kha variš nagroi , a sid’ sanui :
– Hüvä !Tule tänna , kivele .Ištum ühtes , a sid’ lendaškandem sille mägele .
– A minä en mahta leta , − sanui pedran poigaine .
– Avoi , mitte sebranik sinä oled minei ? − sanui variš , maihuti suugil i lendi mägele .
Möst jäi pedran poigaine üks’näze .Astuškanzi se edemba tundradme .Astui , astui i nägišti suren järven , a neciš järves haug’ ujub .
Koverzihe pedran poigaine järvennoks :
– Haug' , haug' !
Haug' ozuti nenan vedespäi :
– Ken mindai kucub ?
– Minä olen pedran poigaine penidenke sarvidenke . Tahtoin sebrastada sinunke !
– Hüvä ! Minä mugažo tahtoin !Čuhlahta vedehe , ujum ühtes da tabadam ahvenid .
– Ka minä en mahta ujuda ! – pöl’gästui pedran poigaine .
Nagroi haug' i sanui :
– Kacu , ka mitte sebranik sinä oled minei ! – sanui haug' i ujui .
Möst pedran poigaine jäi üks’näze .Tuli eht , päiväine zavodi lasktas .Äkkid pedran poigaine nägišti : edahan om lämoi , pažagan rindal ištub ristit , katil’an riputi , keitost keitäb .
Tuli pedran poigaine lähemba .Nägišti sidä ristit i küzui :
– Kuspäi da kuna mäned , pedran poigaine ?
Voikaškanzi pedran poigaine i starinoiči ristitule ičeze gor’as .Ristit kundli kaiken i sanui :
– Ala voika !Oli sinai gor’a , a nügüd’ ei ole necidä .Minä olen sinun sebranik !
Muga jäi pedran poigaine ristitunke i kazvoi sureks vahvaks pedraks suriden da čomiden sarvidenke .
Sanutas , miše siš aigaspäi tundras pedrad oma elänuded ühtes ristituidenke .
Kut pedran poigaine sebranikan löuzi
Veps
New written Veps
–
–
–
–
–
–
–
–
–
–