Texts
Return to list | edit | delete | Create a new | Statistics | ? Help
Koskhaine Anna , Irina Sotnikova. Venälaižiden sömižiden erigoičusiš
Koskhaine Anna , Irina Sotnikova
Venälaižiden sömižiden erigoičusiš
Veps
New written Veps
Necil
kerdal "Karel’skaja kuhn’a i Točka "-projektan ühtnikad da sen päpartn’or Kiži-muzei oliba koumandes gastronomižes ekspedicijas – hö ajoiba čudokahaze Pudožan agjaha .Matkan pätegend oli tundištadas sijaližiden tradicionaližiden sömižidenke da niiden keitändladunke , a mugažo ühtneda Tal’vkalatusen "Pudožan madehed "-festivalihe .
Necil vodel festivalile tuli enamba 300 mest erazvuiččiš Karjalan da Venäman čogišpäi .Muzejan radnik Anna Anhimova vedi sigä mastar’-klassan tradicionaližen karjalaižen disertan vaumištandan mödhe .
– Lapsed surel tahtol härkičiba bolad kagrtauknanke da kerthudenke i rigehtiba adivoita sil ičeze vanhembid da sebranikoid , se oli todeks lujas magukaz . Mugažo festivalin aigan mäni sömižiden konkurs , sen ühtnikad vaumištiba 11 kalasömišt , – starinoiči Anna .
Miše sada tradicionaližid receptoid , projektan ühtnikad vastsihe Kuganavolok - da Avdejevo-küliden , a mugažo Pudož-lidnan eläjidenke .Heile ozastui kirjutada 14 tradicionališt receptad .Niišpäi Vodlozeron keitändladun nel’l’ receptad i Pudožan keitändladun kümne receptad .
– Kacmata sihe , miše nened eländtahod oma ühtes rajonas , niiden keitändladud erineba toine toižespäi . Pudožan kotletoid tehtas madehespäi , Vodlozeron kotletoid – haugespäi .Om melentartušt mugažo , miše Vodlozeron keitändladus tahthan vaumištandan täht ei kävutadud taiginmuigotest , a tehtas podkvasje : ottas koume luzikad rugižjauhod veden ühtele litrale i muigotoittas nel’l’ päiväd .Jäl’ges tehtas tahtast : ottas 70 % rugožjauhod , 30 % – nižujauhod , – sanui Anna .
Tradicionaližiden sömižiden keskes oliba kalakurnikad (erazvuččel formal da erazvuiččen kalanke ), babukkeitoz lihanke , salat haugespäi , avaitud pirgaižed vai rasstegajad , pudožlaižed kalitad , madeh ičeze sokus , paštikod tauknaspäi , leib , kislid i toižed .
Kalitad om popul’arine tradicionaline sömine Karjalas .No kaik-se sen receptad erazvuiččiš eländtahoiš erineba .Kaikuččel emägal oma ičeze peitused kalitoiden paštmižes .
– Pudožan tetaban dizaineran da modeljeran Aleksei Medvedevan mam Tatjana openzi meid paštmaha pudožlaižid kalitoid . Hänen sanoiden mödhe , konz näpištad kalitoid – om tärged tehta korktoid röunid , – sanui Anna .
Kagrkisel’ om äjiden rahvahiden tradicionaline sömine .Pudožan eläi Rimma Krapivina vaumišti kislin "Karel’skaja kuhn’a i Točka " -projektan ekspedicijan ühtnikoiden täht .Miše se oliži magukahamb , voib ližata saharad da void .Äjad ühtnikad homaičiba , miše sen magu om eriline , sihe pidab harjeneda .
– Minä avaižin ičein täht Vodlozeran keitändladun i tahtoin pörttas Kuganavolokkülähä , miše kirjutada receptoid sijaližil eläjilpäi . Om arvokast , miše eläjad kaičeba tradicionaližid sömižid i oma vaumhed jagatas niiden receptoil .Tahtoin , miše enamba pagižižiba venälaižiš sömižiš , päazjas – niiden erigoičusiš , – sanub Anna .
Matkas ozastui kirjutada melentartuižid receptoid , miččidenke tahtoim jagadas teidenke .Naku om üks’ niišpäi – salat nütktud haugespäi .Nece om kebn , no magukaz sömine .Sidä ei voi löuta Internetas , nece znamoičeb – tö voit čudutoitta ičeze heimolaižid da läheližid , konz vaumištat sidä .Receptanke projektan ühtnikoidenke jagoihe Irina Žukova Kuganavolok-küläspäi , Vodlozeron keitändladun kaičii .
Ekspedicijan ühtnikoile ozastui vastatas erazvuiččiden sugupol’viden ezitajidenke a nece znamoičeb , miše keitändladun tradicii eläb .
Salat nütktud haugespäi
Sinei tariž : haug’ , luk , morkofk , sol’ da perc .
Haug’ pidab puhtastada , erigoitta kalaliha rodišpäi , solata (2-3 päiväd ).Jäl’ges pidab keitta kalaliha .Konz se om vaumiž , pidab se panda tarelkaha vilugandemha .Pidab lämbitada rehtil’ , ezmäi žarda sil čaptud luk , jäl’ges – morkofk , kaik pidab vilugoitta .Konz kalaliha linneb vilu , se pidab nütkta penile supalaižile .Salatstaucaha pidab panda haugen liha , ližata sinna žardud luk da morkofk .Panda solad da percad magun mödhe , kaik segoitada .Hüväd sömtahtod !
Venälaižiden sömižiden erigoičusiš
Veps
New written Veps