Texts
Return to list | edit | delete | Create a new | Statistics | ? Help
Valentina Libertsova. Kuulužat suarnuelätit nygöi paistah livvikse
Valentina Libertsova
Kuulužat suarnuelätit nygöi paistah livvikse
Livvi
New written Livvic
Festivualin
iel ehtin vastavuo Anuksen piirin Navigatori detstva -liikkehen johtajan Natalja Andrejevanke da pagizuttua pidoh niškoi .
– Tämä meil on Karjalan tazavallan školaniekoin teatrufestivuali . Valmistetah sidä školien johtajien kazvatandan puoles nevvojat , kuduat nygöi ruatah lapsienke joga opastuslaitokses .Ajua kaikil Petroskoih on jygei , a himoittas , gu enämbi lastu kiinnostuttas teatrah .Se on tärgei kazvatandu - da yhtyndykeino .Sit piätimmö pidiä festivuali piirilöis , a toizih piirilöih työndiä ozutelmien videot , panna net interneettah , gu kaikin voidas suaha hyviä mieldy da tunnustua yhtenäžys .Festivuali on omistettu Ven’an Yhtevyön vuvvele .Potakoičimmo ottua ozutettavakse Ven’an kanzoin rahvahallizii suarnoi , saneli Natalja Viktorovna .
Teatrah niškoi festivualih varustunduaijal oli pandu äijy tieduo Anuksen piirin Navigatori detstva -liikkehen sivule .Alavozen kul’tuurutalois sežo oli luajittu pruazniekallizet välit .Foijees oli suuri čomien eriluaduzien tyttilöin ozuttelu , net ommeltih Anuksen piirin sotsiualukeskuksen Tilkuine-kluubah kuulujat nerokkahat naizet .Vuotanduaijal lapset voidih kaččuo , silittiä , pidiä käzis niidy .
Kaikkiedah kuuzi teatrujoukkuo Anukses , Videles , Alavozes da Tuukselpäi ozutettih omii neroloi laval .Kai lapsien joukot oldih suuret , sentäh gu ozutelmat oli vallittu moizet , kudamis on äijy personuažua .Enimät suarnat oldih ven’alazet dai ezitettih net ven’akse .Karjalazen Puarmu da kozat -suarnan ven’an kielel ozutti enzimäzen Anuksen školan 5. kluasan teatrujoukko (johtai Irina Fedotova ).Sie oli äijy tansii , liikehty da kižua , algavui se runos da kiitändysanois Karjalan muale .Anuksen toizen školan Fantazija-teatru ozutti tuttavan Sutejevan Grivan ual-suarnan .Kaksi tyttösty lugiettih vuorokkai livvikse kiännettylöi da ven’ankielizii tekstoi .Elättilöin sanat kuulutih karjalakse , net sežo vedäjät lugiettih vie ven’akse .
Ihan livvin kielel vai erähien ven’akse sanottuloin virkehienke , kudamil sai enämbäl nagrattua , ezitettih Videlen Neposedi-teatru (ohjuaju L’udmila Iljina ) da Alavozen Mix-teatru (ohjuaju Svetlana Proničeva , opastai Antonina Rossijeva ).Tunduu , gu jo kaksi kerdua teatrujoukot yhtyttih Karjalan Rahvahan Liiton Karjalan suarnu -festivualih Petroskois .
Videlen kebjeijalgazet ozutettih kuulužan ven’alazen Nagris-suarnan mugah livvikse kirjutetun suarnan , kuduas sai vie nähtä karjalazii kižoi da kižaluguloi .Lapset ylen varmah käveltih lavua myö , tarkah , korgieloil iänil sanottih omat sanat .Erähis kohtis kuului videlen murreh , minun mielii myö , sit ei ole nimidä pahua , toiziel eläjii karjalazii yksisama ellendetäh , a oman hierun paginluaduu ei unohteta .
Alavozen Mix-teatru ozutti tämän opastusvuvven Počinpoijat-spektaklin .Tuttavas ven’alazes Kolme počinpoigua -suarnan mugah opastajat azuttih kummakkahan muuzikkuspektaklin nygyaigazien lehtinaizienke , kuduat pagizutetah Hukkua da toizii meččyelättilöi , kummakkahien vuoropaginoinke da pajolonke .Lavan reunal Mix-teatran spektaklilois ainos istutah kandelehel soittajat yhtes opastajan Antonina Vladimirovnanke .Svetlana Pavlovna ylen hyvin maltau keksie liikkehet da kerätä ezitysvehkehet .Yhtes opastajat ommeltah ruutat da keksitäh käzikirjutuksen ."Mix :an " lapset oldih kaikis nuorimat täs festivualis , ga kaččojat puaksuh nagrettih da jälles ozutandua ylen lujah pläkytettih käzii , ainavole joukole kirruttih "bravo ". Kaččojil , kuduat ei malteta livvikse , oli kebjei ellendiä , gu ekruanal silmien ies oldih varustetut kiännökset , kuduat omal aijal muutti iäniohjuaju , Alavozen kul’tuurutaloin emändy Ol’ga Bogdanova .Festivualin vedäjänny oli Alavozen školan johtajan kazvatandan puoles nevvoi Darja Tarabukina .
Lopul kai teatrujoukot dai heijän ohjuajat suadih kiitoskirjazet .Kai ozutetut suarnat eriluaduh opastetah olemah yhtes , kunnivoimah toine tostu , vardoimah keskenästy sobuu .Perustajat uskaldettih , gu nengozet pruazniekat piiris jatkutah .A lavan piäl nostih ilmah kullankarvazet ilmumiäčyt .
Kuulužat suarnuelätit nygöi paistah livvikse
Livvi
New written Livvic