Texts
Return to list | edit | delete | Create a new | Statistics | ? Help
Usko vai omih voimih
Usko vai omih voimih
Livvi
New written Livvic
Se
oli ylen ammui , silloi , konzu kai elätit maltettih paista keskenäh , kui ristikanzatgi .Yksi linduine luadi pellol pezän da haudoi poigazet .Mollei vanhembat lenneltih loitos da tuodih poigazil syömisty .Net istuttih pezäs da vuotettih .Vil’l’at jo oldih kypsät , ga linduzet vie oldih pienet , ei maltettu lennellä .Nähtih poigazien vanhembat , ku rinnal olijal pellol jo vil’l’at kypsettih , dai käskiettih pezäs istujil kuunnella , midä paistah rahvas .
Aijan mendyy tuldih pellole muanruadai da kolme hänen poigua .Tuatto kačoi tähkii dai sanou :
– Kačokkuas , terväh kaikin jo vil’l’ua ruvetah leikkuamah , vai myö vie emmo rua .
– Ole rauhas , tuattozeni , huomei minä kučun omii ystävii dai leikkuammo terväzeh kai vil’l’at .
Paistih , nagrettih kodvazen dai lähtiettih .Linnunpoigazet kai sanat pandih mustoh da illal vanhembien tulduu saneltih .Pöllästyi muamo-lindu :
– Meil roih nygöi lähtie iäres pezäspäi , eiga huondeksel tullah ruadajat da murendetah pezän !
Tuatto-lindu oli vanhembi , se oli äijän nähnyh eläjes .Se sanoi :
– Pangua mustoh minun sanat .Uskuo voibi , ga nikonzu ei sua vuottua , ku kentah tulou abuh .Älgiä varakkua , huomei vie niken ei tule pellole ruadamah .
Mugai rodih .Konzu huondeksel vahnin poigu tuli pellole ystävii vastuamah , niken ei tulluh ruadoh .Muanruadai poijienke istuttih kogo päivän ystävii vuottamas , toinah , hos eräs tulou .Ga sudre vuotettih .Sit keskimäine poigu sanou :
– Tuattozeni , älä hädäilehte .Huomei minä kučun susiedat dai kaikin yhtes terväzeh kai vil’l’at leikkuammo !
Kuultih linnunpenduzet nengoman paginan dai kaiken saneltih vanhembile .Ga tuatto-lindu tähgi sanoi :
– Älgiä ehki varakkua , vie ni huomei täl pellol ei leikata ni yhty tähkästy !
Mugai rodih .Konzu huondeksel keskimäine poigu tuli pellole susiedoi vastuamah , niken ei tulluh ruadoh .Muanruadai poijienke istuttih kogo päivän susiedoi vuottamas , toinah , hos eräs tulou .Ga sudre vuotettih .Sit nuorin poigu sanou :
– Tuattozeni , älä hädäilehte .Huomei minä kučun rodn’ua dai kaikin yhtes terväzeh kai vil’l’at leikkuammo !Hyöhäi ollah kai omat , nepromenno tullah meile abuh .
Saneltih linnunpoigazet vanhembile kaiken , ga tuatto-lindu oli endizelleh rauhas .
– Älgiä varakkua , kai vie on hyvin !
Lähti nuorin poigu rodnii kuččumah , ga niken ei tulluh abuh , kaikil oli omua tärgiembiä ruaduo .Sit muanruadai sanoi omile poijile :
– Gu ruvennemmo vuottamah , kogo ijän voimmo täs joute istuo .Huomei huondeksel otammo čirpit da rubiemmo iče vil’l’ua leikkuamah .Jumal auttau , iče kolmes päiväs kaiken ruammo .
Dai tämän linduzet saneltih illal omile vanhembile .Vaste sit tuattolindu sanoi :
– Nygöi on tulluh aigu lähtie pellolpäi .Segi hyvä , nygöi jo meijän poigazil siivet on lujat .
Linduzet kaikin yhtes kannettih oman pezäzen toizeh kohtah .
A tulien piän huondeksel , odva vai taivas rubei vallottamah , tuldih pellole muanruadai omien poijienke da ruvettih ruadamah .Kai vil’l’at iče leikattih , vai yksi Jumal oli avvuttamas .
Usko vai omih voimih
Livvi
New written Livvic
–
–
–
–
–
–
–
–