Texts
Return to list | edit | delete | Create a new | Statistics | ? Help
Aleksandra Lesonen. Lapšet tykätäh pelata kyykkäh
Aleksandra Lesonen
Lapšet tykätäh pelata kyykkäh
Karelian Proper
New written karelian
Koštamukšen lapšet
, kumpaset opaššutah karjalan kieltä lisäkoulutukšen keškukšešša ta paikallisešša gimnasijašša , tuanoin tuttavuššuttih karjalaiseh kyykkä-pelih .
Parempi kyykkä kiäššä kuin kymmenen mečäššä , neuvou humorini šananlašku .
Pelin šiäntölöistä ta erikoisukšista lapšilla kerto malminrikaštamokombinatin ruataja Eduard Kirjanen – kyykän tuntija ta monivuotini harraštaja .Eduard on Kyykkämukša-joukon ainani ošallistuja .Hiän esittäy kaupunkipiirie erilaisissa kyykkä - ta gorodki -kilpailuissa .
Karjalan kielen opaštajan Anna Nikandrovan šanojen mukah , lapšet pelattih šuurella innolla .
Enšimmäiseššä kierrokšešša voiton otti poikien joukko , a toisešša voitto šuatih tytöt lykättyän enemmän kyykkyä .
Pelin jälkeh Arhippa Perttusen šiätijön ošallistujat piettih lapšilla pieni piknikki Kotiranta-yritykšen lämpimäššä ta mukavašša lehtimajašša .Šielä koululaiset kerrottih omista vaikutelmista ta kisattih kielipelih , min aikana muissutettih karjalaisie šanoja šekä opittih uušie šanoja .
Šamoin lapšilla kerrottih kyykkä-pelin istorijašta , enšimmäiset merkinnät kumpasešta oli luajittu juuri nykysen Koštamukšen kaupunkipiirin alovehella Luvojärven kyläššä , missä nyt šijotah dačat .
Pahah šiäh kaččomatta koululaiset erinomasešti vietettih aikua yštävälliseššä karjalaisešša šeurašša !
Muissutan , jotta kyykkä on vanha kanšallini joukkopeli .Še on šuosittu karjalaisien ta šuomelaisien kešen .Kyykkä-peli muissuttau venäläistä gorodki-pelie , ka pelien šiännöt ollah ihan toisenmoiset .
Enšimmäini tunnettu maininta karjalaisešta perintehelliseštä kyykkä-pelistä kuuluu 1828 vuoteh .Juuri šilloin Elias Lönnrot läksi enšimmäisellä matalla Hämeh , Savoh ta Karjalah .
Vuotena 1894 matalla Vienan Karjalah šuomelaini valokuvuaja , etnografi ta kirjailija Into Konrad Inha kuvasi , kuin Luvojärven kylän eläjät pelatah kyykkäh .
Lapšet tykätäh pelata kyykkäh
Karelian Proper
New written karelian