Тексты
Вернуться к списку
| редактировать | удалить | Создать новый
| Статистика
| ? Помощь
Сидоркин Валерий.
Karjalan kanšallini musejo on päivänšankari
Источник:
Oma mua. № 27, 2026, с. 8
Сидоркин Валерий
Karjalan kanšallini musejo on päivänšankari
карельский: собственно карельское наречие
Новописьменный севернокарельский
Tänä vuotena Karjalan kanšallini musejo täyttäy 155 vuotta. Vuosijuhla on omissettu uuši Meilä on 155! Kokomukšet + -näyttely, kumpani on avattu šielä – aikojen šäilyttäjäššä paikašša.
Musejon peruštamisen istorija alko vuuvven 1871 16. kešäkuuta, kun šen ajan Aunukšen gubernijan johtaja Grigorii Grigorjev avasi esinehkokomukšen näyttely gubernatorin talon yheššä salissa. Joka vuosi täh kokomukšeh lisäyty esinehie. Kun Neuvoštoliiton aika tuli tämä kokomuš šiirrettih Kotišeutumusejoh. Yhtenä šen enšimmäisistä ruatajista oli Vienan meren kallivopiirrokšien löytäjä, tunnetun Kivikirjan šivut -kirjan kirjailija – Aleksandr Linevskii. Myöhemmin Kotišeutumusejo šiirrettih Pyhä Aleksandr Nevskin kirikön rakennukšeh. Šota-aikana še vietih evakkoh, a kun šota loppu še myöšty kirikön rakennukšeh.
Ajan männeššä musejokokomuš kašvo ta kohta esinehie pantih rakennukšen kaikissa kolmešša kerrokšešša. Šuuret näyttöesinehet, kuin Petrovskii-tehtahan tykit ta Aleksandrovskii-tehtahan tuottehet oli ašetettu rakennukšen viereh. Myöhemmin musejo šiirrettih omah istorijalliseh rakennukšeh Leninin aukivolla ta annettih šilla nimi – Karjalan kanšallini musejo.
Nykyaikana musejon fondiloissa on yli 240 näyttöesinehtä. Šen 24 salissa on esinehie Karjalan tašavallan eri aikojen arheologijašta, kotišeuvušta, kulttuurista ta talouven toiminnašta. Šuuri näyttely on omissettu tunnetulla Kalevala-runoelmalla.
Vakituisešša näyttelyššä on vain oša kaikista esinehistä, kumpaset šäilytäh musejošša. Šentäh tärkienä tehtävänä on korjata vuaramuasterin talo, kumpani tuanoin lujašti kärsi tulipalošta. Uuvvissettuh rakennukšeh vois panna uuvvet näyttelyt. Pitkäh aikah ei ole ratkaistu kyšymyš musejon rakennukšen vašemman ošan korjuamisešta.
Kaikista proplemoista huolimatta musejo eläy omua elošta, järještäy näyttelyjä, ohjelmie ta opaš-retkijä. Šillä on kolme ošua: Enšimmäisen venäläisen kurortin musejo, Šoutjärven vepšäläini musejo ta Karjalan rintaman musejo.
