Тексты
Вернуться к списку
| редактировать | удалить | Создать новый
| Статистика
| ? Помощь
Nadežda Vasiljeva.
Kakši päivyä Kalevalašša
Источник:
Oma mua. № 31, 2026, с. 3
Nadežda Vasiljeva
Kakši päivyä Kalevalašša
карельский: собственно карельское наречие
Новописьменный севернокарельский
Heinäkuun viime päivinä Kalevalašša vieraili meijän tašavallan Karjalaisien X kerähmön valtuutettujen neuvošton delegatijo, kummaista johti šen piällikkö Inga Gurilova.
Ativoih kalevalalaisien luokši tuli valtuutettujen neuvošton etuštajie Petroskoista, Aunukšešta, Priäžäštä ta Šegežašta.
Šemmoni etuštava Karjalaisien X kerähmön valtuutettujen neuvošton delegatijo pitän ajan piäštä kävi Kalevalašša enšimmäistä kertua, šentäh työmatka oli täyši tapuamisie ta tilaisukšie.
Issunnošša piirin johtajien kera oli vietetty luaja pakina alovehen talouvellisešta tilašta ta šiitä, mitein matkailualan kehittämini voipi antua uutta impulssie talouteh. Kalevalašša šekä Haikol’an, Vuonnisen ta Jyškyjärven kylissä on mitä näyttyä ta kaččuo turistiloilla. Näijen elinpaikkojen kautti voipi luatie ta järještyä šuuri turistimatka. Onnakko proplema on teijen pahašša kunnošša, eikä ole toivuo šiih, jotta ne lähiaikoina kunnoššetah.
Tapuamisešša rahvahan kera, kumpani piettih Kalevalatalo-etnokulttuurikeškukšešša, Inga Gurilova kerto valtuutettujen neuvošton toiminnašta, šiitä, mitein neuvošto ošallistuu erilaisien lakialottehien valmistamiseh karjalan kielen ta kulttuurin šäilyttämisekši šekä šiitä, mimmoset vielä ratkaisomattomat kyšymykšet šeisotah valtuutettujen ieššä.
Kalevalan piiri on karjalaisien elinpaikka omine perintehineh ta tienestineh. Tunnettu kalevalalaini kanšanmieš Jurii Bogdanov kerto kalaššukšešta šekä šiitä, mimmosie uušie šiäntöjä on kalaštamisešša. Mieš šaneli, mimmosie kirjasie paikallisien eläjien monilukusilla allakirjutukšilla oli lähetetty vaštuavih vallanelimih, jotta korjata Kalaššuššiännöt ta poistua eryähie kieltoja kalan pyynnissä. Ka vielä mimmosiekana liikkehie tällä šuunnalla ei nävy, šentäh Jurii Bogdanov kyšy Karjalaisien X kerähmön valtuutettuja ošallistuo täh kyšymykšeh ta antua apuo kalevalalaisella kanšanmielellä.
Šamoin pakina koški matkailun kehittämisen aspektija Karjalan pohjoispiirilöissä, käsityöjarmankkojen viettämistä, muamonkielen šäilyttämistä šekä valmistautumista Kalevalan pos’olkan (entisen Uhtuon kylän) enšimmäisen kirjallisen maininnan 440-vuotisjuhlan viettoh, kummaista šuunnitellah juhlie enši vuotena.
Valtuutettujen neuvošton delegatijo kävi ta tuttavuštu Vera-volont’orikeškukšen ta Kalevalatalo-keškukšen ruatoh šekä šuoritti kačahušretken piirikeškukšen katuja myöten.
Piirikirjaštošša šillä aikua vietettih Miun Donbass -dokumenttikino esityš ta tapuamini šen luatijan Kirill Ognevin kera. Mieš on Pohjois-Kavkazin taistelutoimien veterani, erolla olija everstileitenantti.
– Vierailu Kalevalan piirih oli hyvin mukava ta hyövyllini. Oli järješšetty äijän tapuamisie paikallisien eläjien kera, kuunneltu eri mielipiteitä, otettu tiijokši monilukusie ehotukšie. Otamma kaiken Karjalaisien X kerähmön valtuutettujen neuvošton tulijah ruatoh, ta še auttau luatie toiminnan vielä täyvemmäkši ta tulokšellisemmakši, korošti Inga Gurilova.
