Тексты
Вернуться к списку
| редактировать | удалить | Создать новый
| Статистика
| ? Помощь
Aleksandra Lesonen.
Lönnrotin matkojen polkuo myöten
Источник:
Oma mua. № 31, 2026, с. 3
Aleksandra Lesonen
Lönnrotin matkojen polkuo myöten
карельский: собственно карельское наречие
Новописьменный севернокарельский
Koštamukšen luonnon-šuojelualovehen luonnonkeškukšešša Rosmolod’ožtoimiston grantin anšijošta on ilmeštyn uuši ekologini Lönnrotin matkojen polku-reitti. Polku jatkau Ihme on lähekkäh -luonnonpolkuo.
Meččäh ašetetut tietotaulut kerrotah kävijillä paikallisien starinankertojien ta Koštamukšen piirin kylien roolista eeppisen Kalevala-runoelman luatimisešša. Istorijallista ainehistuo valmisti Tatjana Berdaševa, a luonnonšuojelualovehen ruataja Valentina Vorobjova autto näyttyä niitä tietoja grafillisissa kuvissa.
Grantin rajoissa luonnonšuojelualovehen ruatajat vuuvven aikana valmissettih nuorie oppahie uutta polkuo varoin. Oppahiksi tultih 3. koulun opaštujat – Enšimmäisien liikkehen ošallistujat. Lapšet tutkittih karjalaisien runonlaulajien perintyö ta muailman kuulusan "Kalevalan" luatimisen istorijua, šuatih tietyä oppimatkareittien valmistamisešta, käytih Koštamukšen luonnonšuojelualovehella.
Šemmosen valmissukšen tulokšena hyö valmissettih "Kalevalalla" omissettu interaktiivini ohjelma. Yheššä luonnonšuojelualovehen ruatajien kera nuoret oppahat vietettih yli 20 tuntie täštä aihiešta Koštamukšen, Kalevalan ta Petroskoin koulujen opaštujilla. Šamoin piettih valokuvakilpailu, kumpani oli omissettu Lönnrotin matkojen istorijalla ta Karjalan kaunehuolla.
Koštamukšen luonnonšuojelualovehen tietojen mukah, projektin tärkiekši ošakši tuli ruato Petroskoin valtijonyliopiston opaštujien kera. Kahešša pyörieššä stolašša ošallistujat käsiteltih, mitein nuoriso voipi ošallistuo kanšankulttuurin šäilyttämiseh, a heinäkuušša hyö käytih entisen Akonlahen kylän alovehella Petrunpäivänä.
Juuri ylioppilahat tultih uuvven Lönnrotin matkojen polku-reitin enšimmäisiksi kävijiksi.
Nyt, konša projekti on lopetettu, kävijät iče šuahah tutuštuo Kalevalan luatimisen istorijah. Tietotaulut värikkähäšti kerrotah karjalaisen kirjallisuon klassikoista, Perttusen runošuvušta, runonlaulajašta Jyrki Kettusešta, "Kalevalan" šynnyštä, nimettömäštä vuokkiniemiläisešta starinankertojašta, Vuassilla Kieleväisešta, Ontrei Malisešta, kekšijäštä ta runonlaulajašta Petri Kettusešta, Akonlahen eläjäštä Savva Trohkimaisešta ta hänen lapšista, runonlaulajista.
