Тексты
Вернуться к списку
| редактировать | удалить | Создать новый
| Статистика
| ? Помощь
Balaban Ol’ga .
“Elonpu”: pajod, nargand da todesine ilo
Источник:
Kodima № 8, 2026, с. 5
Vepsäks kändi Darja Hil’
Balaban Ol’ga
“Elonpu”: pajod, nargand da todesine ilo
вепсский
Младописьменный вепсский
Heinkus Makarjevskaja-küläs mäni tradicionaline Regionoidenkeskeine fol’kloriž-etnografine vepsän kul’turan praznik "Elonpu"-nimel. Kacmata vihmasižehe säha, se jäi ristituiden muštho ičeze lämäl da ilokahal il’mištol.
Kodozero-järven rand ühteks päiväks tegihe todesižeks vepsän kul’turan keskuseks! Meiden "Elonpu"-festival’ zavodihe küliden eläjiden vastusespäi da lämbiti muhuil adivoid Vologdan agjaspäi da Venäman erazvuiččiš čogaižišpäi.
Praznik tuli čomaks da erazvuiččeks. Kaikuččes sijas kului pajoid, a mastariden käveluzkujol oli muga ai käzitehmusid, miše ristitud ei tednugoi, kuna ezmäi kacta. Adivod iče kudoiba tradicionaližid vöid, mujutiba puižid kaluid, tegiba čomitesid kanghal, kaičuzkaluid da eskai openziba pagižmaha čomal vepsän kelel.
Kogonaižen päivän järvenno kehui elo: vepsläižed kollektivad vajehtiba toine tošt scenal, mastarid starinoičiba endevanhoiden radonmahtoiden peitusiš, a mastar’-klassoil sünduiba ezmäižed poimetišed da tehmused – i kaikutte tahtnik voi tehtas necen eläban tradicijan palaks.
Ei jänugoi homaičemata vepsläižed aktivistad-ki, ked tarkas kaičeba da kehitoitaba vepsän rahvahan kul’turad, – heid kittihe scenal, i nece oli eriline da südäntkoskii praznikan pala.
Sen ližaks festivalin aigan radoi "Vepsläine sana" -sija, miččen minä tegin ühtes kolleganke L’udmila Nikolajevna Zagul’ajevanke. "Elonpun" adivod tundištihe vepsän kelenke interaktivižiden tegendoiden abul. Sigä mugažo oli fotosija vepsän kelen kirjamišton kirjamidenke. Starinoičin kaikile tahtnikoile siš, kut oikti virkta da kirjutada vepsläižid kirjamid. Ühtnikad tedištiba kanznikoiden, mec- da kodiživatoiden nimed, čukloutihe vepsän paginaha i kirjkel’he da tegiba küzundoid. Kaikid tedohimoižembad ristitud saiba lahjaks vepsän kelen openduzkirjan. "Vepsläine sana" om unikaline sija, kus voib tedištada midä-se ut, a mugažo väta melentartuižihe vändoihe, miččed abutaba süvemba el’geta da völ enamba navedida endevanhad i čomad vepsän kel’t.
"Elonpu"-praznikal oliba "Vesti 35. RF" -teleradioühtištusen radnikad. Hö pagištoitiba azjtegon ühtnikoid da adivoid.
Meiden "Elonpu"-festivalil kuluiba pajod, nagrand da todesine ilo. Nece tradicijoiden praznik oli täuttud lämäl, ihastusel da ülendusel vepsän rahvahan bohatan kul’turjäl’gestusen polhe.
