Тексты
Вернуться к списку
| редактировать | удалить | Создать новый
| Статистика
| ? Помощь
Jevgenija Kokorina.
Praznik jäti lämän jäl’gen henghe!
Источник:
Kodima № 8, 2026, с. 6
Jevgenija Kokorina
Praznik jäti lämän jäl’gen henghe!
вепсский
Младописьменный вепсский
P’otran da Pavlan päiväl vepsläižes Šokš-küläs mäni čoma praznik – "Pühä päiväine". Kaikuččen voden heinkus Šokš- da Kvarcitniiküliden eläjad, adivod susedkülišpäi da Petroskoišpäi keradase pallištol, mitte om Šokšun školan edes.
Praznik ihastoiti adivoid! Vanhad da nored veslas mänetiba aigad ühtes. Ken-se kacui koncertad, ken-se osti lahjoid muštoks möndsijal, ken-se ühtni konkursaha, ken-se pajati, ken-se kargaiži, ken-se kaburzi tutabid da starinoiči ičeze elon polhe.
Täl vodel irdal oli räk. Kacmata sihe rahvast oli lujas äi. Šokšun Kul’turpertin pämez’ da radnikad vastsihe adivoid avoin südäimil, kaburziba i sidoiba adivoiden kagluihe puižen monetan, miččes om kirjutadud "Pühä päiväine". Nüguni kaikuččel ristitul, ken oli pühäl, om mušt praznikan polhe.
Pallištol oli erazvuiččid mastar’-klassoid lapsiden i aigvoiččiden täht. Ičeze käzil voi tehta sumkoid, pidimid telefonan da avadimen täht, necen voden simvolan – hebo-tätüižid. Mugožo ristitud voiba väta "ristad da nolad"-vändoho puižel laudaižel. Toižed ladiba kerata puižen Karjalan kartan – nece om hüvä maht kodvda, kut mö tedam ičemoi kodimad.
Praznikan hüvä tradicii om konkursoid. Adivoile taritihe tehta kodiš parahiman vastan, änikkirbin i änikpal’mikon. Stol, miččel oliba tehmused konkursan täht, oli lujas duhukaz, ved’ kezan keskes pöudoil änikoičeba parahimad änikod.
Praznikan tegijad johtutiba adivoile siš, miše P’otran da Pavlan päivaspäi zavodihe heinäntegon aig. Pallištol oliba sur’ sat da harav. Kaikutte voi tehta foton neciš melentartuižes sijas. Irdal oli lujas läm’. Ristitud muhaziba toine toižile, kändiba modoid laskavaha päiväižehepäi, joiba čajud magukahidenke pirgoidenke, a ümbri kuluiba vepsän pagin da kantelen äned. Aig joksi teravas i südäimes oli mugoine taht, miše praznik ei lopnuižihe!
"Pühä päiväine" oli koumanz’ i jäl’gmäine vepsläine tradicionaline praznik Änižröunas necil vodel. Om hüvä, miše tradicijad eläba, miše vepsläižed oma ühtes, miše armastuz ičeze rahvahaze ei väl’dü!
Ližatedoid
- Ezmäižen kerdan vepsän kul’turan "Pühä päiväine" -praznik mäni Šokšus vodel 2005.
- Praznikan tomotajan om vepsläine aktivist Jurii Mihailovič Mugačev.
- Voden 2005 kezakus külän eläjad kerazihe ühtes, miše kundelta vanhoid vepsläižid pajoid, kargaita kadrilid da kitta päiväšt sen lahjoiš – muga päiväine tegihe praznikan simvolaks.
- Tradicionaline vepsläine sömine praznikal om kalitad, miččed nahodiba päiväižehe.
- Praznik vedetas heinkus surel pallištol läz Šokšun školad.
- Necil vodel praznik mäni P’otran da Pavlan päiväl. Neciš päiväspäi zavodiše heinäntegon aig.
