Тексты
Вернуться к списку
| редактировать | удалить | Создать новый
| Статистика
| ? Помощь
Иванов Василий.
Ičein ma kämnes-ki om sula
Источник:
Kodima № 8, 2026, с. 6
Иванов Василий
Ičein ma kämnes-ki om sula
вепсский
Младописьменный вепсский
Piterin agjan vanhas Tervalas mäni tradicionaline "Enarnema"-praznik. Necil kerdal praznikan temaks oli ottud muštatiž – "Ičein ma kämnes-ki om sula". Kaik sädandezitused oli omištadud kodiröunale da ezitatoiden melevudele.
Praznik vastsi adivoid lämäl säl, eskai päiväine läksi pil’višpäi. Mahtaba sijaližed eläjad ladidas londusenke! Praznik avaižihe eriližen veron mödhe – savikelloižiden heläidusespäi. Se znamoiči arvostust Kodiman rahvahiden kul’turihe. Praznikan adivoid-ki pakitihe mända heläidajiden kelloižiden al.
Tradicijan mödhe praznikal kuluiba vepsläižed pajod, fol’klormuzik, voi nähta tradicionaližid karguid, mujada vepsläižid kalitoid, vedetihe horovodoid. Kaikutte tahtnik voi ühtneda mastar’-klassoihe, miččil opetihe tehmaha käzil muštlahjoid, vastoid, čomenzoitmaha pr’anikoid. Jarmarkal voi kacta da ostta tetabiden mastariden da taidehpirdajiden tehmusid puspäi, savespäi, raudaspäi, nahkaspäi, luspäi da villaspäi.
Ičeze ezitusil adivoid ihastoitiba fol’klorkollektivad Pöudon, Podporožjen, Vsevoložskan, Boksitogorskan agjoišpäi, Piterišpäi, kantelistoiden ansambl’ Karjalaspäi i toižed. A praznikan adiv vepsläine runoilii Viktor Trifojev lugi čomid runoid kodiröunas.
Praznikan aigan kaikuččel tulijal oli voimuz čukloutas rahvahan kul’turan čudokahaze mirhu, kus eläbzuba vanhad verod da tradicijad, kulub eläb vepsän pagin. Praznik oli vessel, ühtenzoiti lapsid, norid, vanhoid, johtuti kaikile, kut oma kal’hed kodiröun, tradicijad da sugupol’viden sido.
