Тексты
Вернуться к списку
| редактировать | удалить | Создать новый
| Статистика
| ? Помощь
Irina Zaitseva.
Vepšäläisien starinojen ta nuorison yhissyš
Источник:
Oma mua. 2026. № 33. С. 8
Irina Zaitseva
Vepšäläisien starinojen ta nuorison yhissyš
карельский: собственно карельское наречие
Новописьменный севернокарельский
Elokuun toisen netälin alušša Kantele-yhtyvehen konserttišalissa piettih Vepsläižed starinad-projektin esittely.
Tilaisuš keräsi niitä, ket kiinnoššutah vepšäläisien kulttuurista ta kieleštä. Pivon uattona juhlittih Muailman kantakanšojen kanšainvälini päivä. Juuri šiih merkkipäiväh oliki šijotettu presentatijo.
– Vepsläižed starinad -projekti on šuunnattu vepšäläisien kielen, folklorin ta perintehien šäilyttämiseh ta popularisointah nuorison kešeššä. Vuuvven 2026 elokuušta alkuan vuuvven 2027 oraškuuh šuaten šuunnittelemma viettyä kulttuuri- ta šivissyštilaisukšie, kumpaset yllytetäh nuorie kiinnoštumah vepšäläisien kulttuurista, perintehistä, kieleštä ta folklorista. Tarkotušryhminä ollah Karjalan nuoriso ta ylioppilahat, muun muašša Enšimmäisien liikkehen aktivistit, Petroskoin valtijoyliopiston opaštujat ta yläluokkalaiset. Elvytämmä kulttuurin ainutluatuista ošua nykyaikasien luovien muotojen avulla. Niih kuulutah dramatisointa, elävä musiikki, horeografija, šelitti Kulttuurin kehitykšen liigan etuštaja, projektin ohjuaja Tatjana Kuz’minih.
Projektin innoštajana on Karjalan anšijoitunut artista, Kanšallisen teatterin näyttelijä Aleksandra Aniskina. Omana tärkeimpänä elämäntehtävänä hiän pitäy vepšäläisen kuttuurin popularisointua. Aleksandra on Kantele-yhtyvehen ihailija ta monta vuotta ruatau yheššä kollektiivin kera. Häneštä yhtyvehen artistojen nero hyvin šopiu projektih.
Aleksandra Igorevna kerto projektin piätilaisukšista.
– Rupiemma toteuttamah šuurta tutkimušruatuo – keryämäh folklorie Karjalan tašavallan vepšäläisistä kylistä, ruatamah arhiivoissa ta kirjaštoissa. Piätehtävänä on muanitella nuorisuo. Enšimmäisenä tärkienä tilaisuona on tietokilpailu, kummaista piemmä Petroskoin, Priäžän ta Onegarannan piirien kouluissa. "Kantelen" artistat lisätäh šiih luovutta. Šamoin 24. šyyškuuta kučumma kaikki- ja "Kantelen" taloh konferenšših. Šiinä pakinašoun muuvvošša kerromma, kuin vepšäläiset eletäh nyt ta mitein kannatetah omua kulttuurie. Nuoret šuahah ošallistuo luovih tilaisukših. Konferenššin tarkotukšena on kertuo nuorisolla, jotta vepšäläiset ollah tärkiet Venäjällä, Karjalalla ta kaikilla, ket eletäh meijän alovehella.
Projektin tärkeimmäkši luovakši tapahtumakši tulou teatterimaini Ei-lapšelliset starinat-ohjelma.
– Konša aloin tutkie vepšäläisie starinoja, huomasin, jotta monet starinat ei šovita lapšilla. Vepšäläiset starinat opaššutah, jotta ei kaikki asiet elämäšša loputa hyvin. Šentäh teatterimaisella ohjelmalla on šemmoni nimi. Juuri Kantele-yhtyveh voipi toteuttua šitä parahiten. Enši-ilta on näytettävä vuuvven 2027 kevätkuun lopušša, šaneli Aleksandra Aniskina.
Aleksandra Igorevna luki keräytynyillä vepäläisen starinan ta vietti halukkahilla mukavan tietokilpailun. Kantele-yhtyvehen artistat näytettih vepšäläisien kulttuurin parahie mallija näyttämöllä.
Lakienluajintakokoukšen deputatti Tatjana Tiškova šano omua mieltä, jotta projektie pitäy leventyä, jotta Karjalan joka piirissä šuatais tutuštuo vepšäläiseh kulttuurih šemmosešša muuvvošša.
Šamoin lämpimie šanoja projektilla šanottih kuulusat tietomiehet – etnografi Zinaida Strogal’ščikova ta kielentutkija Nina Zaitseva.
Projektie toteutetah Kulttuurin kehitykšen liiga -kanšalaisjärještö ta Karjalan laulun ta tanššin kanšallini Kantele-yhtyveh Karjalan tašavallan piämiehen granttišiätijön tuvella.
