Тексты
Вернуться к списку
| редактировать | удалить | Создать новый
| Статистика
| ? Помощь
Nadežda Vasiljeva.
Perintehien malttamini ta uuvvistamini
Источник:
Oma mua. 2026. 02.09 (№ 34). С. 2
Nadežda Vasiljeva
Perintehien malttamini ta uuvvistamini
карельский: собственно карельское наречие
Новописьменный севернокарельский
Vähän yli 25 vuotta Kalevalašša toimiu paikallini Uhut-šeura -kanšalaisjärještö, kumpani kannattau karjalan kieltä ta kulttuurie.
Uhut-šeura peruššettih vuotena 2000. Šen peruštajana ta johtokunnan enšimmäisenä piämiehenä oli Viktor Mihailovič Melentjev. Šeuran ruavon piätarkotukšena aina oli vienankarjalaisien kulttuurin ta kielen kehittämini ta popularisointa, kanšanperintehien elvyttämini šekä niijen välittämini kašvajalla šukupolvella, jotta nuoret tiijettäis oman kotišeuvun istorijua, arvoššettais ta muissettais šitä.
Vuosien mittah tällä šuunnalla šuoritettih šuurta työtä – piettih eri tilaisukšie, kilpailuja, karjalaisie urheilukilpailuja, festivalija. On mahotointa luvetella kaikkie. Šitä ruatuo autto kalevalalaisien aktiivini ošallistumuni ta monien tärkeijen projektien toteuttamini. Uhut-šeuran projektitoiminnašta tuli järještön ruavon erottamatoin oša.
Tänä vuotena šeura piäsi voittajien lukuh Karjalan tašavallan piämiehen granttišiätijön enšimmäiseššä kilpailuvalinnašša. Granttitukie tavotteli yli 50 projektie. Niistä 16 alotehta šai tukie.
Niijen luvušša on kalevalalaisen kanšalaisjärještön Meijän perintehet: malttamini, omakšumini, uuvvistamini -nimini projekti. Ruato šen rajoissa on alkan ta keštäy 12 kuukautta. Alottehešša on nellä šuuntua: urheilu, ruoka, musiikki, taitošana. Ne on šuunnattu karjalaisien perintehien šäilyttämiseh ta lisyämiseh šekä nuorien ta keški-ikäsien perehien houkutteluh.
Projektih on liittyn jo yli 15 perehtä. Ne ollah aktiiviset ta huolehtivaiset aikuhiset ta lapšet. Hyö halutah elyä omalla kotimualla ta enemmän šuaha tietyä šen perintehistä. 23. elokuuta hyö kaikin keräyvyttih šuureh Kalevalan perehkisat -tilaisuoh. Šiitä alko Meijän perintehet: malttamini, omakšumini, uuvvistamini -projektin šuuri taival. Projektin ošallistujat tutuššuttih šiih, min kera hyö ruvetah ruatamah ta mi leventäy heijän tietoalua kanšanelinkeinojen aiheista.
Kuittijärven rannalla väliaikasella kentällä järješšettih kyykkä-työpaja. Ammattipeluajan Žanna Tikkasen luokše tuli ušeita ihmisie, ket haluttih ottua käteh pualikka ta lyyvvä kyykkih. Kaikki halukkahat voitih tutuštuo pelin istorijah, šiäntölöih ta yksityiskohtih. Työpajojen tarkotukšena on joukon peruštamini ta ošallistumini kilpailuih Piäjärven pos’olkašša ta Koštamukšešša.
Vähän etähämpi Žanna Nikonova vietti omua ruokatyöpajua. Oli melko helppo valmistua karjalaisie šulččinoja, ka ne tultih tosi makeiksi. Lapšet iče luajittih niitä ta mielelläh šyötih prossahutulla täytettyjä sriäpnöjä. Yksi ošallistujista kyšy muamolta, ruvetahko hyö paistamah šemmosie piiraita koissa. Še oli korkein arvošana!
Muamot, tuatot ta heijän lapšet mielenkiinnolla opaššuttih viisikielisen kantelen enšimmäisie akordija. Projektin rajoissa peruššettava perehyhtyveh kaunistau Meijän perintehet: malttamini, omakšumini, uuvvistamini -alottehen lopputilaisutta enši kešänä.
Projekti loppuu tilaisuoh, kumpani on omissettu Vieno Kettusen 100-vuotisjuhlalla. Karjalan anšijoitunut artista šynty Kalevalašša ta oli šen kunnivoeläjä.
– Tämänpäiväset Kalevalan perehkisat on vain meijän šuuren taipalen alku. Toivon, jotta teilä še tulou mielenkiintosekši, aktiivisekši, tiijollisekši ta yllyttäy aikuhisie šekä lapšie tutkimah vienankarjalaisien perintyö, kiänty ošallistujien puoleh projektin ohjuaja Svetlana Jalovitsina.
Meijän perintehet: malttamini, omakšumini, uuvvistamini-projekti starttasi. Ottuan huomijoh šitä, kuin šuurella halulla šen ošallistujat tultih enšimmäiseh tilaisuoh, voipi varmašti šanuo, jotta ruato tulou tulokšellisekši. Epäilömättä projektista tulou vielä yksi panoš Uhut-šeuran hyvien ruatojen šiäštökköh.
