Тексты
Вернуться к списку
| редактировать | удалить | Создать новый
| Статистика
| ? Помощь
Karjalan kieli Yandex:as
Источник:
Oma mua. 2026. 09.09 (№ 35 (1825)). С. 2
Karjalan kieli Yandex:as
карельский: ливвиковское наречие
Новописьменный ливвиковский
Yandex-kiändäi nygöi käyttäy karjalan kieldygi. Kaikin, kel on tarvehtu da himuo, voijah kiändiä sen avul karjalankielizii tekstoi enämbäle migu suale kielele da järilleh.
Se on suuren yhtehizen ruavon tulos, kuduah yhtyttih tiedoinstituutat, yhteiskunnallizet järjestöt da omal himol ruadajat Kanzalližuksien azieloin federuallizen agenstvan da "Ven’an kanzoin koin" kannatuksel.
Karjalan kielen Yandex:an palveluh juuroittamine on tärgei askel karjalan kielen säilyttämizes da kehittämizes nygözis ololois. Kieles kuvastuu kanzan omaluaduvus, sen vuoh säilytäh da siirrytäh polvi polveh perindöt da tavat, kielen vuoh rahvas suajah yhtevytty toine toizeh.
Tänäpäi Yandex-kiändäi ruadau Ven’an kanzoin enämbäl migu 20 kielel. Karjalan kieli on enzimäine Karjalan kandukanzoin kielis, kudual ruadau Yandex-kiändäi.
Suuri ruado on pietty Kanzallizen da alovehellizen poliitiekan ministerstvan piän al, kudai yhtisti Karjalan tiedokeskuksen Kielen, literatuuran da histourien instituutan, Karjalan piämiehen tyves toimijan termistökomiisien, yhteiskunnallizien liittoloin da volont’ouroin ruadoväit.
Neiroverkon opastamizekse oli luajittu tekstoin korpussu kahtel kielel – karjalakse da ven’akse. Tekstoin joukos oli karjalan kielele kiännettyy kirjalližustevostu, internet-entsiklopeediedu, kanzalliskielizien julgavoloin tekstoi da erillisty resursua: VepKar-kielikorpussu da multimediasanakirju LiPaS. Suuren panoksen täh ruadoh on luajittu Oma Mua -lehten toimittajat da lehteh kirjuttajat, karjalan kielen opastajat da omal himol ruadajat.
— Karjalankielisty Yandex-kiändäjiä ruadoh pannes on käytetty enämbi 86 000 virkehty karjalan da ven’an kielel da läs 100 000 virkehty ilmai kiännösty kontekstan levendämizekse da kiännöksen parandamizekse, ilmoittau Kanzallizen da alovehellizen poliitiekan ministerstvu omassah tiedottehes.
Karjalankielisty Yandex-kiändäjiä käyttäjes pidäy ruadua muga: saital – avakkua translate.yandex.ru, ylembäzel panelil vallikkua luvettelus karjalan kieli da miäräkkiä kiännöksen suundu: karjalan kieli → ven’an kieli libo vastukavai ven’an kieli → karjalan kieli, sijoitakkua kiännettävy tekstu da Yandex kiändäy sen. Telefonas: kieliluvettelus vallikkua karjalan kieli. Yandex-ečos: käytäkkiä kiännös-ozastuo, vallikkua kieli, sijoitakkua tekstu da Yandex kiändäy sen.
