Тексты
Вернуться к списку
| редактировать | удалить | Создать новый
| Статистика
| ? Помощь
Сидоркин Валерий.
Nuoruš šuattau kaikkie
Источник:
Oma mua. 2026. 09.09 (№ 35 (1825)). С. 4
Сидоркин Валерий
Nuoruš šuattau kaikkie
карельский: собственно карельское наречие
Новописьменный севернокарельский
Petroskoissa toimiu nuorien taiteilijien ta disainerien näyttely.
Karjalan kulttuurin ta taijon kolledži täytti tänä vuotena 90 vuotta. Merkkipäivällä omissettu Nuoruš šuattau kaikkie -näyttely avattih Petroskoin Käsityötalošša.
Ekspositijošša on ešillä taito-ošašton viime vuosien piäštökkähien diplomiruatoja šekä nykysien opaštujien käsitöitä ta projektija. Näyttelyn vierahat voijah ihual’l’a studenttien luovua potentialie, heijän tuoretta kaččomušta kanšankäsityön perintehih ta korissuštaitoh.
Luovuon šuunnat ollah monipuoliset. Näyttelyššä voipi nähä šemmosie kolledžin opaštujien töitä, kuin perintehellisie ta nykyaikasie naispukuja, tekstiilikompositijoja, kukloja, korissukšie, pitsijä ta plakattija. Kaikkieh töitä on yli šata.
Näyttelyn avuau šuuri Karjalan ornamentti -šeinäpanno, kumpasen on valmistan kolledžin piäštökäš Ol’ga Ipatova. Šamoin huomijuo kiinitetäh kolme nykyaikaista naispukuo yhtehisellä nimellä "Karjalan marjat", missä halliččou kirkaš ruškie väri – puolan ta karpalon väri. Še on opaštujien yhteistyö.
Toisista merkittävistä töistä panen merkillä Nast’a Stepanovan šuuren tilkkupannon "Tie kirikköh", Evelina Ržankovan Äijäpäivä-kuklakompositijon, Julija Kolasovan litografijat kankahalla "Puanajärven eläinmuailma", Darja Bel’akovan Ainon kuva -kirjonnan kylmällä batikilla šekä äijän muita erinomasie luatijan- ta yhteistöitä.
– Šuurin oša töistä on meijän studenttien kokemuš, kumpani keräytyy jo yli 30 vuotta. Diplomitöissä on esillä kuin taitošuunta, niin ni grafiset työt. Kolledžin istorija alko kirjaštotehnikumista, šentäh meilä on niise kirjoja, kumpaset täyvennetäh fondie, kertou taito-ošašton opaštaja Nadežda Tološinova.
– Taito-ošašto on meilä yheltä puolelta nuori, a toiselta puolelta šuurine juuriloineh, šentäh kun korissuštaito ta käsityöt ollah ilmanikusie.Kaikki kehittyy hyvin ruttoh, šentäh myö avasima vielä disainiošašton. Nyt taito-ošaštošša on kakši alua. Yksi šäilyttäy kanšanperintehie ta toini luatiu niitä lähemmiksi nykyihmisellä, koroštau kolledžin johtaja Svetlana Medvedeva.
Hyvä, jotta kolledžin studentit kuin šäilytetäh, niin ni kehitetäh kanšankäsitöitä ta korissuštaituo. Hyö ei varata rohkiešti kuotella ta panna perintehet uuših taitomuotoloih.
Nuoruš šuattau kaikkie -näyttely toimiu Käsityötalošša 30. šyyškuuta šuaten, piäšy on ilmani.
