Тексты
Вернуться к списку
| редактировать | удалить | Создать новый
| Статистика
| ? Помощь
Maikki Remšujeva.
Karjalan kanšojen keittijö: luve, valmissa ta šyö
Источник:
Oma mua. 2026. 16.09 (№ 36 (1826)). С. 2
Maikki Remšujeva
Karjalan kanšojen keittijö: luve, valmissa ta šyö
карельский: собственно карельское наречие
Новописьменный севернокарельский
Šyyškuun 8. päivänä Karjalan Kanšallisešša kirjaštošša piettih Karjalan kanšojen keittijö -kirjan presentatijo. Tilaisuš šijotettih uuteh pruasniekkah – Venäjän kanšojen kielien päiväh.
Kuin koroššettih järještäjät, kirja tuli šuuren ruavon tulokšekši. Karel’skaja kuhn’a i Točka -projektin rajoissa oli pietty 10 matkua Karjalan piirilöih, kyšytty 50 ihmistä, kirjutettu yli 120 reseptie, luajittu kiertävä valokuvanäyttely.
Projektin ošallistujat käytih Jyškyjärveššä ta Vuokkiniemeššä, Virmašša, N’uhčašša ta Sumskoi Posad -kyläššä, Kinnermäššä ta Alavoisešša, Aunukšešša ta Votlajärveššä šekä monissa toisissa paikoissa.
– Projekti keräsi reseptit, valokuvat, pakinat ta kertomukset. Joka kyläššä meijät lämpimäšti otettih vaštah, näytettih, kuin valmissetah perintehellisie šyömisie, tuttavuššutettih vanhoih reseptilöih, kumpasie šäilytetäh joka pereheššä, kerto projektin johtaja Anna Anhimova.
Värikkähäh kirjah, kumpasešša on 160 šivuo, on kerätty 50 ainutluatuista reseptie karjalaisešta, vepšäläiseštä ta venäläiseštä perintehelliseštä ta nykyaikasešta keittijöštä. Kirjašša esitettyjen šyömisien joukošša on višpipuuro, palašokeri, kalakukko leiväššä, šienišoussi, kakraletut, kuoreh voissa, nalituškat, merižar’oha, mähnäletut, kiuru-piiruat, mussikkakiisseli.
Karjalaisissa ta vepšäläisissä kylissä kerätyt reseptit on kiännetty karjalan ta vepšän kielillä. Kiännökšet valmissettih Oma Mua- ta Kodima -lehtien toimittajat. Kaunehet kuvat kirjua varoin otettih valokuvuajat Ilja ta Marija Timinit.
Kirjan presentatijošša šen luatijie tervehti Kiži-musejon johtaja Jelena Bogdanova. Petroskoin kaupunkineuvošton piämieš Nadežda Dreizis onnitteli projektin joukkuo ta jako kiitoškirjasie.
Karjalan kanšojen keittijö -kirja tuttavuššuttau alovehen kanšallisen keittijön erikoisukših šekä auttau šäilyttyä Karjalan kantakanšojen kulttuurie ta perintehie. Painokšen šähköversijuo voit lukie jokahini halukaš. Linkki helpošti löytyy internetistä. Videoita reseptien kera voit kaččuo Šuomelais-ugrilaisien kanšojen liigan VK-šivulla.
Uuši kirja oli valmissettu Karel’skaja kuhn’a i Točka -projektin rajoissa, kummaista toteutti Šuomelais-ugrilaisien kanšojen liiga. Projektie kannatti Karjalan piämiehen granttien fondi ta Kiži-musejo.
