Тексты
Вернуться к списку
| редактировать | удалить | Создать новый
| Статистика
| ? Помощь
Сидоркин Валерий.
EtnoSMART-forumi keräsi yštävieh
Источник:
Oma mua. 2026. 16.09 (№ 36 (1826)). С. 2
Сидоркин Валерий
EtnoSMART-forumi keräsi yštävieh
карельский: собственно карельское наречие
Новописьменный севернокарельский
EtnoSMART-forumi keräsi eri kanšojen etuštajie viijenteh kertah. Tänä vuotena tapahtuma kešti kuuši päivyä. Še piettih Petroskoissa ta Aunukšen piirissä.
Forumin piäjärještäjinä ollah Karjalan kanšallisen ta alovehellisen politiikan ministerijö, Periodika-kuštantamo ta Karjalan kanšojen yštävyštalo.
Juhlalliset avajaiset vietettih Karjalan Kanšallisešša teatterissa, kunne keräyty 300 vierašta: viranomasie, kanšalais- ta etnokulttuurišeurojen etuštajie, tieto- ta opaššušalan ruatajie, volont’orija, yhteiskunnallisien järještöjen jäšenie Karjalašta, Moskovaša, Piiteristä, Komista, Mari Elistä, Mordovijašta, Leningradin, Murmanskin, Tulan, Sverdlovskin, Belgorodin alovehilta šekä Valko-Venäjältä. Forumih ošallistu äšen vieraš loittosešta Indijašta Ankit Tripahti.
Keräytynyitä tosi lämpimäšti tervehti Karjalan piämieš Artur Parfenčikov ta Venäjän valtijonduuman kanšanetuštaja Valentina Pivnenko. Hyö koroššettih, jotta on hyvin merkittävä še, jotta forumi pietäh Venäjän kanšojen yhtenäisyön vuotena.
Šamoin avajaispivošša myönnettih palkintoja Karjalan kanšojen yhtenäisyön alalla ruatajilla aktivistiloilla.
Illan lopušša piettih šuuri konsertti, missä esiinty Karjalan piäkaupunkin lapši- ta aikuhisryhmie. Teatterin etušalissa toimi tašavallan valokuvakilpailun voittajien näyttely "Miun armaš šeutu – Karjala".
Iellisinä päivinä ruato jatku kolmešša ošaštošša, missä nuoret käsiteltih šemmosie kyšymykšie kuin Venäjän kanšalaisien identiteetti, media-alan ruatuo yleisön kera, sosialisie proplemoja. Oli äijän luventoja ta esitykšie, käytännölisie harjotteluja ta vuoropakinoja, ekskursijoja ta kokemukšen vaihtuo.
Esimerkiksi, toisešša ošaštošša šuurta huomijuo šai Kiži-musejon ruatajan, Šuomelais-ugrilaisien kanšojen liigan johtajan Anna Anhimovan esityš. Hiän šaneli, kuin valmissettih Karjalan kanšojen keittijö -kirja, kumpani oli julkaistu forumin kynnykšellä ta kumpaseh on kerätty karjalaisien ta vepšäläisien perintehellisie reseptijä.
Forumin loppuoša oli pietty Petroskoin lisäkši Aunukšen piirissä. Šiih ošallistu vain nuorisojärještöjen jäšenie.
