Тексты
Вернуться к списку
| редактировать | удалить | Создать новый
| Статистика
| ? Помощь
Bogdanova Natalja.
Oma sana lähendäy
Источник:
Oma mua. 2026. 16.09 (№ 36 (1826)). С. 4
Bogdanova Natalja
Oma sana lähendäy
карельский: ливвиковское наречие
Новописьменный ливвиковский
Meijän valdivos enzimästy kerdua piettih Ven’an kanzoin kielien päiviä. Pruazniekkua vaste Seesjärvikeskus omii varastoloi tallendamizekse otti vastah kirjoi karjalan da ven’an kielil, kuduat lahjoitettih Oma Mua -lehti da Karjalan Rahvahan Liiton johtokundah kuulujat.
Seesjärvi-keskus nygöi on ainavo "kul’tuurutulehmo" Karhumäin piirin Puadenen kyläs da se on ainavo tugi lähikylien eläjilegi. Nygöi keskus sijoittuu yksikerroksizes puuhizes rakendukses da seizou ravien koin rinnal, kuduas kokotetah uvvet ikkunat. Sinne pluanoin mugah pidigi sijoittua Seesjärvi-keskus. Ga nygöi se on salvas, inženieruverkot suuren pakkazen aigah rikkovuttih.
Vaigevuksih da varoin vahyöh huolimata "Seesjärvi" ruadau da ielleh vamistau Puadenen da sen lähi kylien tärgevimii tapahtumii. Yhtes kylän školan kel keskuksen ruadajat valmistetah pidoloi, kuduat kehitetäh karjalazien kul’tuurua, säilytetäh histouriedu da kazvatetah nuores polves oman muan suvaičustu.
Suurdu ruaduo Seesjärvi-keskus pidäy Ižänmuallizen voinan partizuanoin da saldatoin muston säilyttämizekse, sikse pietäh vastavuksii da yhtehisty ruaduo eččojoukkoloin kel. Aktiivizes ruavos da avus Seesjärvi-keskuksen ruadai Raisa Bogdanova tämän vuvven elokuus on suannuh tänä vuon kymmene vuottu täyttänyön Ven’an federatsien ammundutarbehil varustettuloin voimien veteruanoin Karjalan yhteiskunnallizen järjestön mustomerkin.
Tämän vuvven lopus, talvikuus 10 vuottu täyttäygi Seesjärvi-keskus. Ku hyvin da kunnon luaduh pidiä pruazniekku kyläs, kuduas Karhumägessäh on läs sada kilometrii da enin pala dorogua on huonuo kunduo, pidäy abuu da kannatustu. Oma Mua -lehten ruadajis da Karjalan Rahvahan Liiton johtokundah kuulujis lahjakse työtyt kirjat, kuduat tuodih Petroskoilpäi, ylen hyvin pätäh keskuksele.
