Тексты
Вернуться к списку
| редактировать | удалить | Создать новый
| Статистика
| ? Помощь
Alina Gapejeva.
Jessoil’ču on täyttänyh 90 vuottu
Источник:
Oma mua. 2026. 16.09 (№ 36 (1826)). С. 8
Alina Gapejeva
Jessoil’ču on täyttänyh 90 vuottu
карельский: ливвиковское наречие
Новописьменный ливвиковский
Vangiluagerin vaigevuksis läbi piässyh naine säilytti hengen voiman da syväinkerän lämmyön.
Jessoilan kyläs eläi Taisija Rod’kina on täyttänyh 90 vuottu. Häneh kaččojes et ni usko, ku pasportas ollah moizet suuret igäluvut. Taisija Grigorjevna on sidä lujua sugupolvie, kenen syväinkeriä vesti vaigei elaigu. Lapsennu Tas’a oli fašistoin luageris, oli nälläs da vilus, pani muah omii. Ga hirvielöih koitteluksih huolimata häi on säilytännyh elaijan rakkahuon, se on tovelline hengen urhotego.
Taisija Grigorjevnan ruadotaival on kunnivoittavu. Naine algoi ruadua poštal, sit kolmekymmen vuottu ruadoi sanitarkannu mielibol’ničas Säpsän kyläs. Sie häi ruadoi eläkkehelegi piästyy ihan bol’ničan salbuandah suate.
Elaigu äijän kerdua koittelii naizen lujuttu. Häi pani muah kaksi vahnembua poigua, vaste ei ammui pereheh tuli uuzi gor’a – erillizes voinuoperatsies surman sai hänen aino bunukku Sergei. Taisija Grigorjevna oppiu pyzyö pystöi, häi lugou, ombelou da nieglou ilmai očkii.
Taisija Grigorjevnua puaksuh kučutah kylän školah. Lapsile häi kerdou omua elostu. Hänen eletyt vuvvet ei olla opastuskirjois lugietut virkehet, se on elävy histourii, kuduadu tärgei on kuulta ristittyzis, kuduat iče sidä nähtih da elettih. Moizet vastavukset ollah nuorile tovelline urhuon da omanmuan suvaičuksen urokat.
Merkittävii vuozii täyttänytty inehmisty käydih hyvittelemäh valdivovallan herrat. Taisija Grigorjevna sai Priäžän piirin piämiehen Dmitrii Bujevičan da Jessoilan kylän piälikön Lidija Pajusovan kiitändykirjazet. Ga kaikis suurin lahju hänele on omien rakkahus da oman koin lämmin.
Omat kyläläzet toivotetah Taisija Grigorjevnale lujua tervehytty, rauhuttu, hyvytty da omahizien akkiloičustu. Tämän inehmizen elaigu äijile on ezimerkinny, kui vaigevuksis läbi piästyy säilyttiä syväinkeräs valgei da hyvys.
