Тексты
Вернуться к списку
| редактировать | удалить | Создать новый
| Статистика
| ? Помощь
Sananluojat palkittih Petroskois
Источник:
Oma mua. 2026. 23.09 (№ 37 (1827)). С. 2
Sananluojat palkittih Petroskois
карельский: ливвиковское наречие
Новописьменный ливвиковский
Petroskoin linnas Karjalan kanzoin ystävyskois palkittih Sananluojat-kilvan voittajii.
Karjalas on loppevunnuh alguajien karjalakse, vepsäkse da suomekse kirjuttajien kilbu. Arvostusjoukko valličči parahii runoloi, prouzu- da lapsile tarkoitettuloi kirjutuksii. Arvostusjoukkoh kuului opastusalan ruadajua da yhteiskunnallizih liittoloih kuulujua rahvastu, joukkoviestimien toimittajua da valdivovallan herrua. Kilbah työttylöi ruadoloi arvostettih eri kriterieloin mugah: mielikuvat, kirjutuksen stiil’u da sen omaluaduvus, selgei ezitys da kirjuttajan taidovoimu.
Kilbah oli työtty 21 tevostu 13 kilbuniekas.
Nominatsies "Omaluaduine prouzu- da runohustevos kanzallizil kielil" enzimäzele sijale on piässyh Oma Mua -lehten toimittai L’ubov’ Baltazar. Häi on suannuh voiton livvinkielizien runoloin kogomukses.
– Täh kilvah annoin erilazii runoloi Karjalan rahvahah da luondoh näh.
"Algajien" kilbah päin sentäh, ku minul ei ole painettuu kirjua, hos runuo on jo vägi tukku, enimät jälgimäzien viijen vuvven aigua, konzu rubein uvvessah ruadamah Oman Muan toimitukses. Buite en ni olis ihan "algai". Ezmäzet runot oli painettu Carelia -lehtes konzu piätoimittajannu oli Paavo Voutilainen. Kävyi meijän toimitukseh da joga kerdua minul juohatteli, käski kirjuttua. Vie sih aigah oli lyhyzii lapsien runoloin kiännöksii Kipinäs painettu, sanoi L’ubov’ Ivanovna.
Hänen sanoin mugah, runuo olis jo ylen äijy.
– Runoloin kiändämine kiinnittäy mieldy ylen ammui da äijäl, dai ainos luven teoriedu, mi vai silmih puuttuu. Erähii runoloi, mit iččie miellytetäh, punon mieles sissäh, kuni se rubieu pajatuttamah. Vaste sit runo on valmis, jatkau L’ubov’ Baltazar.
Toizele sijale on piässyh tuaste Oma Mua -lehten toimittai Uljana Maksimova. Häi on työndänyh kilbah oman kerdomuksen "Pohjazen mečän emändy".
– Ainehistuo sih kerdomukseh olen kerännyh vuvven 2024 kezämatkois. Silloi myö ajelimmo Vuokkiniemeh da Venehjärveh. Sie olles käimmö vahnale kalmužimale da ihan vuottamattah kalman lavvoin alahanpäi lendi ilmah sotku. Enzimäi ylen äijäl pöllästyimmö, a sit rubeimo miettimäh: lindu nouzi lendoh kalmaspäi, kui ristikanzan hengi ilmah da vahnu kalmu rodih sotkale da sen poijile suojuskohtannu.Mugai juohtui piäh kirjuttua kolmes linnus – jouččenes, sotkas da haikaras, sanoi Uljana.
Kolmanden sijan on suannuh vepsäläine Nadežda Agapitova, kudai opastuu vepsiä kielikursiloil. Häi on työndänyh kilbah lapsienkirjutuksen "Kitti da Šarik Kaleges".
Nominatsies "Prouzu- da runohustevoksien kiännökset ven’an kielele" voittajakse on sanottu Ol’ga Hramtsova, Karjalan opastuskeskuksen kehityksen instituutan vahnin metodistu. Ol’ga Anatoljevna on kiändänyh kilbah Miikul Pahomovan lyydinkielizen Andeli-runon.
Toizele sijale on piässyh lapsien Kipinä-lehten toimittai Ol’ga Dubitskaja. Kilbah häi on kiändänyh katkelman P’otr Sem’onovan kirjas "Puhtasjärven Maša".
— Olen kiändänyh ven’akse livvin murdehes. Se ruado minuu miellyttäy. Otin toizen luvun palazen, sie P’otr Mihailovič kirjuttau, kui Maša opastuu školas, sit lähtöy abuh sizärellyö, kudai on suannuh kaksozet, sanoi Ol’ga Dubitskaja.
Hänel jo on kogemustu kiännösruavos. Ol’ga on kiändänyh 60 tuhattu kirjutusmerkii Yandex-kiändäjän ruadoh panemizekse. Niilöin tekstoin joukos oli literatuurutevostu da Oma Mua -lehteh painettuloi kirjutuksii.
Kilvan täs nominatsies kolmandele sijäle on pandu lyydinkarjalaine Ol’ga Pozdn’akova. Kilbah häi on kiändänyh lyydikse vienankarjalazen Ildupagin-runon.
– Olen ihastuksis, ku merkile pandih juuri Sergei Jakovlena runon lyydikse kiännös. Sergein kel kirjuttelimmo toine toizele, kiännin hänen runoloin, ku net ylen äijäl miellytettih minuu. Luvin niilöi da kiännöksii da työndelin Sergeile kuunneltavakse. Hänen runuo "Muamolla" ei sua lugie kyynälittäh. Sengi kiänin.
Moizet kilvat, tiettäväine, iestetäh karjalan kieldy edehpäi da kannatetah sen kehitysty. On ylen tärgei kirjuttua omal kiele da kiändiägi karjalakse.
Kilvan voittajat suadih diplomat da palkindot Kanzallizen da alovehellizen poliitiekan ministran Sergei Kisel’ovan käzis.
