Тексты
Вернуться к списку
| редактировать | удалить | Создать новый
| Статистика
| ? Помощь
Uljana Maksimova (Tikkanen).
Elävän perinnön paja piettih Vuokkiniemen kyläššä
Источник:
Oma mua. 2026. 23.09 (№ 37 (1827)). С. 3
Uljana Maksimova (Tikkanen)
Elävän perinnön paja piettih Vuokkiniemen kyläššä
карельский: собственно карельское наречие
Новописьменный севернокарельский
Trajektorija-fondi kävi tietehelliskäytännölliseh tutkimušmatkah Vuokkiniemeh elokuušša.
Elävän perinnön paja-projektin piätehtävänä oli tutkie talonpoikien aittoja ta riihie – Vienan Karjalan puuarhitektuurin muistomerkkijä ta Koštamukšen kaupunkipiirin piänähtävykšie.
Tutkijien ruavon tehtävinä oli kačella ta mitata rakennukšie, kerätä tietuo niistä, nähä mitä on korjattava enšiksi. Näijen tietojen mukah projektiryhmä valmistau kunnoššušprojekti.
– Viime vuotena kävimä tänne ta näkimä, jotta aittojen ryhmä on tosi pahašša kunnošša, erityisešti vesikattoja. Pitäis tehä mitänih aittojen pelaštamisekši, muitein kavotamma ne. Projektin rajoissa arhitektorit ta opaštujat valmissettih mittaukšie, kačeltih joka rakennukšen kuntuo. Tutkimukšen peruštamisella myö taričemma kunnoššušprojektin. Šuuri restaurointi on pitkä ta vaikie ruato, ka alušša vois luatie pikkukorjaukšie tahi konservatijo, šelitti projektin spesialisti Aleksandr Jäskeläinen.
Tutkijien porukka on kiinnoštun karjalaisešta rakennuštaijošta, heilä oli jo kerrottu korjauštavoista, talojen ta taloušrakennukšien erilaisista erikoisukšista. Tutkimušmatalla hyö voitih käyttyä šuatuja tietoja.
Paja toimi yhekšän päivyä ta šiinä aikana oli valmissettu nellän aitan ta yhen riihen tarkat piirrokšet, kerätty tietuo paikallisilta eläjiltä. Rakennukšien kaikki ošat piiruššetah ehottomašti käsin paperilla.
– Näin huomuat pikkujaki yksityiskohtie: missä mitä puuta käytettih, mitä kavotettujen ošien jälkijä jäi, avattihko ovi šiämeh tahi ulošpäin ta oliko še aina niin. Još ottua valokuvie ta šiitä luatie piirroš tietokonehella monie yksityiskohtie voipi jättyä huomuamatta, šano projektin spesialisti Jurii R’abinkin.
Projektin aikana oliki mahollisuš tutuštuo karjalaisih kylih: Venehjärveh ta Pirttilahteh.Venehjärveššä ryhmä tutuštu kylän istorijah ta šen šäilyttäjäh Aleksandr Lesoseh šekä käveltih Šamanin polkku-matkua myöten. Pirttilahešša oli tutkittu vanhoja taloja ta taloušrakennukšie.
Trajektorija-fondi piti projektie Vuokkiniemeššä, Pohjosen hyvyš -fondin grantin rajoissa.
