Тексты
Вернуться к списку
| редактировать | удалить | Создать новый
| Статистика
| ? Помощь
Veikkolainen Ilona.
Galina Fedulova: “Kieli vägie teile andau”
Источник:
Oma mua. 2026. 23.09 (№ 37 (1827)). С. 5
Veikkolainen Ilona
Galina Fedulova: “Kieli vägie teile andau”
карельский: ливвиковское наречие
Новописьменный ливвиковский
Anuksen kirjaston ruadai Galina Fedulova siirdyi toizele ilmale enämbän kuudu tagaperin. Minul on vaigei uskuo sih.
Näimmökseh hänen kel vähimite kerran vuvves Vladimir Brendojevan literatuurufestivualis. Häi aivin oli hyväs mieles, paginakas, hyväsydämelline. Olin varmu, ku ainos vastuan hänen Anuksen kirjaston tilois. Tänä vuon en puuttunuh vastavuo hänen kel.
Tuttavuin Galina Fedulovah tuhukuus vuvvennu 2009, konzu minä da endine Oma Mua -lehten toimittai Jelena Filippova pagizutimmo händy elaigah da ruadoh nähte. Vastavuimmo kirjastos. Häi kučui meidy pieneh pertizeh, taričči čuajuu da myö rubeimmo pagizuttamah händy.
Galina Fedulova puaksuh muhizi omas ruavos, karjalan kielen säilyttämizes kerdojes. Nuorennu toimittajannu en tiedänyh, ku minun ies istuu suuri ristikanzu. Hänen piän al Anuksen kirjaston kanzallizen literatuuran ozasto valmisti enzimäzen Vladimir Brendojevale omistetun festivualin. Sen jälgeh festivualii ruvettih pidämäh joga vuottu. Silloi häi kerdoi, ku äijät Anuksen eläjät oldih hyväs mieles, ku tämänmoine festivuali on olemas. Festivualin alguh panduu rahvas ottavuttih karjalan kielen opastumizeh da erähät ruvettihgi kirjuttamah karjalankielizii kerdomuksii da runoloi.
Galina Fedulova rodivui Anuksen piirin Sudalan kyläh.
– Lapsennu minä en käynnyh päivykodih. Buabo kazvatti minuu da vie kaksi minun sizärdy. Meil kois paistih vai karjalua, kerdoi Galina Mihailovna meile silloi.
Konzu häi lähti školah enzimäzeh kluassah, karjalua ei käytetty äijäl.
– Školas opastajat da opastujat kačottih hämmästyksis tyttyö, kudai ei tiedänyh ni yhty sanua ven’akse, kerdoi häi.
Fedulovan ammatin vallindah vaikutti kirjastonhoidai Jevgenija Ivanova.
– Kylän kirjasto oli pieni da sie ainos oli vilu, sendäh lugijat käydih kirjastoh harvah. Jevgenija Ivanova otti kirjoi šalguh da käveli niilöin kel talois toizeh. Häi kerdoi kirjoih nähte muga mieldykiinnittäjen, ga mieli käski lugie sen. Lapsennu autoin händy azettamas kirjoi pualičoile. Käin kirjastoh hyväl mielel, musteli Galina Mihailovna.
Paginan keskes häi kerdoi, ku rubei kirjuttamah runoloi karjalakse.
– Minä kirjutan iččeh nähte. Runoilen, konzu olen hyväs mieles. Toiči syvendyn lapsusmustoloih, kerdoi häi silloi.
Fedulovan mieles Brendojevan festivualiloi pidäs järjestiä.
– Net innostetah ristittyzii opastumah kieleh da tutkimah kodirannan histouriedu, sanoi häi.
Enzimäzen paginan jälles kiänyin Galina Fedulovan puoleh mondu kerdua. Häi oli ainos valmis auttamah.
Vuvvennu 2023 kävyin Brendojevan festivualih. Galina Fedulova vastai minuu hyväl mielel. Silloi kyzyin hänel, tunzigo häi Vladimir Brendojevua?
– Tuttavuin häneh vuvvennu 1978 kirjalližuskluubas. Brendojev lugi omii runoloi da sežo Rasul Gamzatovan Kurret-runon karjalakse kiännöksen. Kuulin karjalankielizii runoloi enzi kerdua. Vastavuksen jälles Brendojev lahjoitti minule oman runokirjan. Karjalankielizih runoloih nähte kerroin kaikile omile sugulazile da tuttavile. Hyögi tahtottih lugie runoloi karjalan kielel, musteli Galina Fedulova.
Brendojevan kuolendan jälles Anuksen kirjaston ruadajat ruvettih pidämäh kirjalližusillačuloi.
– Tapahtumis paistih karjalakse da lugiettih Brendojevan runoloi. Nämmih pidoloih käi rahvastu, ket odih kiinnostuttu karjalazien kul’tuuras da karjalan kielen säilyttämizes. Erähäs moizes pivos juohtuigi mieleh pidiä literatuurufestivuali, kerdoi Fedulova.
Himoittas uskuo, ku literatuurufestivualiloin piendyperindö Anuksen lohkol jatkuu ielleh da se rodieu Galina Mihailovna Fedulovan hyväkse mustokse.
