Тексты
Вернуться к списку
| редактировать | удалить | Создать новый
| Статистика
| ? Помощь
Uljana Maksimova (Tikkanen).
Iänettömyš: myö olemma hil’l’asuon rahvaš
Источник:
Oma mua. 2026. 23.09 (№ 37 (1827)). С. 8
Uljana Maksimova (Tikkanen)
Iänettömyš: myö olemma hil’l’asuon rahvaš
карельский: собственно карельское наречие
Новописьменный севернокарельский
Petroskoin Art-prospekttila avasi uuši näyttelykauši. Šyyškuun alušša oli avattu Iänettömyšnäyttely. Esillä on Al’ona Ignojevan ta Arsenii Morozovin luatimie valokuvie.
Luonto on piäroolissa
Esitettäväkši oli valittu mušta-valkosie valokuvie, kumpasissa on Karjalan luontuo: vesi, meččä, taivaš šekä ihmini luonnon helmašša. Valokuvissa näkyy muan, vejen, ilman ta ihmisen muailmojen välisie yhtevykšie.
Tuuli noštau ualtoja ta šamalla heiluttau pal’l’ahin jaloin veješšä šeisojan neiččyön tukkua – valokuvuaja huomuau uallon ta tukan šamanmoista liikehtä ta ikuistau šen hetkeššä.
Pilvet kuletah taivahalla, mänty šeisou rannalla – valokuvašša myö niämmä, jotta pilven muoto muissuttau männyn latvua.
Šuuren männyn kuorešša on halkiema – še on kuin puun šyväin.
Joka kuvašša voipi nähä šitä, mitä valokuvuaja huomasi, a huomata šemmoista šai vain hil’l’aisuošša ta kunnena kiirehtämättä kačellen ympäröivyä muailmua. Šitä ni haluttih näyttelyn järještäjät šelittyä vierahilla.
Vaikka valokuvissa melkein ei ole ihmisie, niijen olomašša oluo missänih lähellä voipi tuntie.
– Mie tahon kiittyä kaikkija ihmisie, kenen kera mie ruavoin. Vain teijän anšijošta monet valokuvat šynnyttih ta šynnytäh vielä. Ihmisellä on oikein tärkie rooli elämäššäni ta ihmini on mukavin, mitä vain voipi kuvata ta tutkie. Ihmistä kuvuamalla mie tutkin iččieki, työ oletta miun peilinä, a mie teijän, šano valokuvuaja Al’ona Ignojeva.
Näyttelyššä voipi tutkie hil’l’aisutta
Avajaisih tuli valokuvuajien yštävie šekä ne, kellä tämmöni kaččahuš muailmah on lähini. Vierahat kačeltih valokuvie, paistih keškenäh ta kuunneltih pianon iänijä – muusikko Serafima Rinkevič šoitti ičen šepittämyä musiikkie, a šiitä ni toiset näyttelyššä olijat ruvettih šoittamah. Musiikki aina auttau ymmärtämäh šitä, mitä šanoin on vaikie šelittyä.
– Kuot’elkua kačella näitä valokuvie niin, jotta tuntie oman ičen šiämeššä šielun liikehtä ta huomatkua, mitä täštä tulou, šano tulluilla valokuvuaja ta käsityömuasteri Arsenii Morozov.
Koko näyttelyn idejana on tutkimuš, kuin valokuva voipi näyttyä hil’l’aisutta. Mimmosie tuntehie tämmöni valokuva šynnyttäy?
– Hil’l’asuš valokuvašša on visualini kuva, še on šeisatettu aika. Iänettömyš-projektissa luonto tulou piäšankariksi. Iänettömyttä myö tunnemma pehmieššä valošša, vapaissa tiloissa, vejen läikyissä – šelitti näyttelyn kurattori Natalja Loginova.
Näyttely opaštau olla iänettömänä ta huomuavaisena, ihmitellä, kuin äijän mukavua voipi šyntyö mielikuvašša hil’l’aisuošša ta opaštau huomata elävyä muailmua, kun piäšet näyttelytilašta pois.
Kačella "Iänettömyttä" voipi Art-prospekt näyttelytilašša pimiekuun 3. päiväh šuaten.
