Тексты
Вернуться к списку
| редактировать | удалить | Создать новый
| Статистика
| ? Помощь
Sergejeva Anna.
Vepsän kelen opendai Šokšun školaspäi om parahim Venämal
Источник:
Kodima. 2026. 23.09 (№ 09 (402)). С. 1
Sergejeva Anna
Vepsän kelen opendai Šokšun školaspäi om parahim Venämal
вепсский
Младописьменный вепсский
Sulakus Petroskoiš mäni "Parahim kodikelen da literaturan opendai" -konkurs, miččel valitihe opendajad, kudambale pidi ezitada Karjalad ühthižvenälaižel etapal. Siloi meiden valdkundaspäi oli valitud Šokšun školan vepsän kelen opendai Gleb Fomin.
Konkursan ühthižvenälaine etap mäni Lipeckas 7.–11. sügüz’kud. Kaiked neche etapaha ühtni 131 opendai 87 regionaspäi, hö ezitiba Venäman rahvahiden 38 kel’t.
– Vides vodes konkurs tegihe popul’arižeks, joga voden ühtnikoiden lugu kazvab. Ezmäižel vodel ühtni 69 mest 68 agjaspäi. Vides vodes konkursal oli ezitadud 47 rahvahiden kel’t, – sanui Venäman tedoiden levinzoitamižen ministr Sergei Kravcov.
Konkurs mäni Venäman rahvahiden ühtmuden vodel da Päivkodin opendusen vodel. Vides päiväs konkursan ühtnikoile pidi ozutada ičeze opendusen metodikoid, vedäda urokoid, mastar’-klassoid, a mugažo ezmäižen kerdan hö ühtniba "Tedoiden levinzoitamižen radmahtoho". Gleb Fomin päzui kaikiš konkursan kodvusišpäi, ozuti nügüdläižid vepsän kelen opendusen metodikoid.
– Ičein urokal kingitin homaičusen sihe, miše nügüdläižil tehnologijoil da vändoil om sur’ znamoičend opendusen täht. Ned tegeba kelen opendamišt melentartuižembaks lapsiden täht. Kaikid jügedamb oli kaks’ jäl’gmäšt tegendad. Meile ei anttud aigad, miše vaumištadas. Minä pagižin siš, miše om tärged ei vaiše kaita kel’t da tradicijoid, no mugažo kacta tulijaha aigaha i kehitoitta opendusen metodikad. Tarbiž, miše kel’ eläiži kaiktäna, – sanui Gleb.
– Minä voibištelimoi lahjakahiden opendajidenke Venäman erazvuiččiš agjoišpäi. Olen ihastusiš, miše ozastui ezitada Karjalad čomin. Tahtoin sanuda spasib laheližile, kollegoile, Karjalan Opendusen kehitoitandan institutan radnikoile da kaikile, ken tugezi mindai. Uskon, miše nece vägestuz om toižiden sabustusiden augotiž. Jatktan rata edemba-ki kodikelen hüvüdeks, – ližazi Gleb.
Johtutam, miše täl vodel "Parahim kodikelen da literaturan opendai" -konkurs mäni jo videnden kerdan. Gleb Fomin ühtni sihe muloi-ki, no siloi vägestusen regionaližel etapal sai Šoutjärven školan opendai Anastasia Jevtušenko. Meiden röunan opendajad todištiba, miše kaiken voib sabustada, ku om sur’ taht da uskond ičeze vägihe.
