Тексты
Вернуться к списку
| редактировать | удалить | Создать новый
| Статистика
| ? Помощь
Galina Baburova.
Uz’ openduzvoz’ om zavodinus
Источник:
Kodima. 2026. 23.09 (№ 09 (402)). С. 3
Galina Baburova
Uz’ openduzvoz’ om zavodinus
вепсский
Младописьменный вепсский
Kalagen školas zavodihe openduzvoz’ 59 openikan täht. Ezmäine kelloine heläiži ezmäižen klassan nellän openikan täht.
Sügüz’kun 1. päiv om mugoine praznik, konz openikad da heiden kazvatajad oma holiš: kut mäneb uz’ openduzvoz’, om-ik kaik vaumiž opendushe? No enamba kaiked holduba ezmäižiden klassoiden openikad, kudambad vaiše päzuiba lapsiden päivkodišpäi i nügüd’ zavodisoiš opetas školiš.
Täl vodel Kalagen školas ezmäine kelloine heläiži ezmäižen klassan nellän openikan täht. Kaik openikad oma neičukaižed. Praznik mäni školas. Ezmäižen kerdan kului uz’ školan gimn da oli ezitadud uz’ gerb – molembad sädiba iče opendajad. Sid’ lugetihe ozatelendsanoid Änižröunan pämehelpäi Andrei Anatoljevič Red’kinalpäi. Mugažo praznikanke lapsid ozateli Kalagen eländtahon pämez’ Mihail Aleksandrovič Pol’akov.
– Tradicijan mödhe mö lahjoičem lahjoid nenile lapsile, kudambad saskeleba openduses hüvid arvznamoid. Mugažo kitäm opendajid, kudambad radaba školas enamba 30 vot. Neciš azjas meile abutaba kivisaskelmižen radištod, – sanui školan pämez’ Svetlana Nikolajevna Gotič.
Sid’ kelloižehe soitiba 11. klassan openik Art’om Ščerbakov da 1. klassan openik Anna Sotnikova. Uz’ openduzvoz’ zavodihe Kalagen školan 59 openikan täht. Kevädel škol pästi kahesa openikad. Kaik ned nügüd’ jatktaba opendust Petroskoin universitetas da opištoiš. Kaks’ pästnikad sai korktoid balloid ekzamenoil da vahvištoitiba kuldaižiden medaliden samižen.
– Kaiken ližaks meiden školas om erazvuiččid sebroid lapsiden täht. Hö voiba kudoda, väta lendmäčvändoho, opetas vändmaha pianol, gitaral, balalaikal da äi tošt, – starinoiči Svetlana Nikolajevna.
Midä koskeb vepsän kel’t, ka sen urokoid vedetas školas kerdan nedališ 1.-11. klassoiš, niid vedäb Maria Aleksandrovna Mironova. Kalagen školan openikad ühtneba erazvuiččihe vepsän kul’turan festivalihe, kodikelen olimpiadoihe da paksus tegesoiš niiden vägestajikš.
