Тексты
Вернуться к списку
| редактировать | удалить | Создать новый
| Статистика
| ? Помощь
Irina Sotnikova.
“Pohjoiždölon melodijad” ühtenzoitiba vähäluguižid rahvahid
Источник:
Kodima. 2026. 23.09 (№ 09 (402)). С. 4
Irina Sotnikova
“Pohjoiždölon melodijad” ühtenzoitiba vähäluguižid rahvahid
вепсский
Младописьменный вепсский
Sügüz’kun 3.-6. päivil Piterin agjas mäni IX Vähäluguižiden suomalaiž-ugrilaižiden da samojediden rahvahiden sädandradon ühthižvenälaine festival’, miččen nimi om "Pohjoiždölon melodijad". Se oli omištadud Venäman rahvahiden ühtmuden vodele da Venäman rahvahiden keliden päiväle. Festival’ ühtenzoiti Venäman 13 rahvast.
Tradicijan mödhe kaikuččen voden festivalihe ühtniba mugoižed vähäluguižed rahvahad, kut vepsläižed, nencad, saamelaižed, ižora, vod’, sel’kupad i toižed. Hö keradase ühtes, miše ozutada ičeze tradicijoid, fol’klorad, radonmahtoid da vajehtadas mahtištol kul’turjäl’gestusen kaičendas da kehitoitandas.
Praznikal oli äi sädaikollektivoid, ned tuliba Murmanskan, Tomskan, Piterin, Pskovan, Krasnojarskan agjoišpäi, Karjalaspäi, Udmurtiaspäi, Jamalo-Neneckijan da Hanti-Mansiiskan ümbruzkundoišpäi. Vepsän kul’turad ezitiba Vepsän rahvahan hor Karjalaspäi da "Varasta"-ansambl’ Piterin agjaspäi.
Praznikan avaiduz oli Venäman tedoakademijan Piterin erištos. Se zavodihe čomal koncertal, mitte ühtenzoiti kaikid adivoid. Ühtel laval voi kulištada suren man erazvuiččiden rahvahiden änid, melodijoid da nägištada rahvahaližid sädoid.
Festivalin aigan mäni konferencii, kus vähäluguižiden suomalaiž-ugrilaižiden da samojediden rahvahiden tradicijoiden kaičijad jagoihe ičeze mahtištol da pätusil kul’turjäl’gestusen kaičendas, pagištihe siš, kut voib kingitada noriden homaičust keliden opendamižehe da tradicijoiden kaičendaha. Mugažo adivoiden täht tehtihe tundištoituzmatk Kunstkameraha – Venäman ezmäižehe muzejaha, mitte lahjoiči heile unohtamatomid tundmusid.
– Ühtnend mugoižihe festivalihe andab voimusen tundištadas toižiden rahvahiden kul’turidenke, radonmahtoidenke, veroidenke, vajehtadas mahtištol, vastata vanhoid sebranikoid da sada uzid, a mugažo ozutada ičeze rahvahan henged da erigoičusid, – sanui Vepsän rahvahan horan ühtnik Natalja Anhimova.
Festivalin toine pala sirdihe Viborgaha. Praznikprogramm mäni Viborgan zamkas. Sigä-žo oli avaitud mastariden ozuteluz, radoiba mastar’-klassad, a "Ezitatoiden šuhaiduz" -kvest andoi adivoile voimusen čukloutas endevanhoiden maiden legendoiden mirhu. Viborgan zamkas pälaval mäni čoma koncert, kus eziniba sädaikollektivad. Oli äi rahvahaližid pajoid, tradicionaližid vändoid da karguid.
– Festival’ oli lujas čoma, sille kerazihe enamba 350 mest, lujas äi adivoid tuli erazvuiččiš agjoišpäi. Festivalin ühtnikad 17 kelel starinoičiba meiden suren man kul’turiden erigoičusiš. Vastuz oli lujas läm’. Mö olim kuti üks’ sur’ kanz. Kaik ümbri toi hüväd mel’t: hüväd ristitud, heiden muhud, čomad sädod, läm’ sä, – sanui Natalja.
Festival’ oli tehtud Venäman kul’turministerstvan da Piterin agjan valdmehišton tugel. Se pidetas vodelpäi 2010 kerdan kahtes vodes.
