Тексты
Вернуться к списку
| редактировать | удалить | Создать новый
| Статистика
| ? Помощь
Galina Baburova.
Karjalan tradicionaližed receptad – ühtes kirjas!
Источник:
Kodima. 2026. 23.09 (№ 09 (402)). С. 4
Galina Baburova
Karjalan tradicionaližed receptad – ühtes kirjas!
вепсский
Младописьменный вепсский
"Karjalan rahvahiden keitändlad" -kirjan prezentacii mäni Karjalan Rahvahaližes kirjištos. Adivoid tuli lujas äi.
Kirjläksi eloho "Baltianmeren suomalaižiden rahvahiden liga" -organizacijan "Karel’skaja kuhn’a i Točka"-projektan aigan. Se oli rahatugetud Karjalan Pämehen grantoiden fondal. Kirjan prezentacii mäni Venäman rahvahiden keliden päivän Karjalan Rahvahaližes kirjištos.
"Karjalan rahvahiden keitändlad" -kirjan vaumičendan aigan oli tehtud ekspedicijad Karjaladme. Niiden taguiči sijaližil eläjilpäi oli kirjutadud 120 receptad, kuvatud 30 videorolikad da tehtud tuhid fotokuvid. 50 parahimad receptad mülüi udehe kirjaha. Erasiden receptoiden rindal oma kändmižed karjalan da vepsän kelihe.
– Tegihe sel’ktaks, miše rahvahaline keitändlad om popul’arine tem. Se om melentartušt erazvuiččile sugupol’vile. Tahtoim tehta receptoiden kirjan nügüdläižes formatas. Panim kirjaha vaumištadud sömižiden fotoid. Olem mugošt mel’t: konz kacud kuvaha, ka sündub taht ladida keitta vai paštta iče, – starinoiči projektan ohjandai Anna Anhimova.
Projektaha ühtniba tedomehed, muzejiden radnikad, fotokuvadajad, keitäjad. Ühtnikoiden sanoiden mödhe, Karjalan lidnoiden da küliden eläjad vastsiba heid lujas lämäs, hö surel tahtol jagoihe ičeze perehiden sömižen vaumičendan tradicijoil.
– Projektan taguiči oleskelin Karjalan küliš, miččiš en olend olnu sihesai. Ende meletin, miše, ozutesikš, "oiktad" kalitkad pašttas muga, kut paštoi minun baboi. Nügüd’ el’gendan, miše kaikuččes perehes voib olda ičeze receptoiden erigoičusid. I nece om lujas melentartušt! – sanui projektan ühtnik, Kinerma-külän kaičii Nadežda Kalmikova.
– Olen ihastusiš, miše meile ozastui starinoita lugijoile desertoiš-ki. Kerazim äi melentartuižid receptoid. I voin rohktas sanuda, miše völ om midä kirjutada. Vähäntetabid receptoid om äi! – ližazi Anna.
Prezentacijal "Kiži"-muzejan radnikad, tohisižiden astjoiden da kaluiden mastarid Irina da Vladimir Titovad johtutiba kaikile, miše tohespäi tehtud astjad oma tarbhaižed da čomad.
Etnograf Zinaida Strogalščikova starinoiči kaikile, kut Anna Anhimovan baboin sizar, Polina Polikarpovna L’ovkina Šoutjärvespäi, kaiken vastsi adivoid magukahil vepsläižil paštatesil.
– Laps’aigal kaikuččen pühäpäivän minun baboi paštoi pirgoid. Minun uništusen oli kaita ezitatoiden receptoid. En usko, miše nece uništuz tuli eloho. Nügüd’ minä olen jo vaumiž toižihe projektoihe. Tahtoižin kerata ühthe pühäsižiden somižiden receptoid.
"Karjalan rahvahiden keitändlad" -kirjan tiraž om 500 ekzempl’arad. Tahtnikoid sada mugoižen kirjan ičeleze om lujas äi. Sikš sen tegijad vaumištiba kirjan elektronižen versijan, mittušt voib löuta "Kiži"-muzejan oficialižel lehtpolel da "Baltianmeren suomalaižiden rahvahiden ligan" -gruppas.
