Тексты
Вернуться к списку
| редактировать | удалить | Создать новый
| Статистика
| ? Помощь
Irina Mironova.
Hänen heng holdub külän elos
Источник:
Kodima. 2026. 23.09 (№ 09 (402)). С. 5
Irina Mironova
Hänen heng holdub külän elos
вепсский
Младописьменный вепсский
Valentina Grigorjevna Agafonova Kalagespäi praznuiči 90-voččen jubilejan. Kaiken elon hän omišti ristituile da külän elole. Tämbei-ki hän jäb aktivižen, hüväsüdäimeližen ristitun, kudamb rigehtib abuhu kaikuččele.
Valentina Grigorjevna Agafonova om sündunu Anna Aleksejevna da Grigorii Petrovič Šuvalovoiden kanzas 16. sügüz’kud vodel 1936 Vologdan agjan Oštas. Möhemba kanz tuli elämaha Kaskezaha, kuspäi oliba maman vepsläižed jured. Sigä Valentina lopi kaks’ klassad. Konz kanz tuli elämaha Šoutjärvehe, Val’a jatksi opetas školas Mägel.
Opendusen jäl’ghe Valentina Grigorjevna radoi počtal. Konz hän openzihe operatoraks, händast oigetihe radmaha Derev’anka-stancijale. Sigä hän radoi operatoran da počtmehen.
Kalagehe Valentina Grigorjevna tuli noren. Läksi mehele. Valentina Grigorjevnal da Ivan Kuz’mičal om sündnu kaks’ tütärt – Nina da Larisa. Mužik oli lujas hüvä, radonnavedii, no hän lujas aigoiš koli. Valentina Grigorjevnale pidi kazvatada lapsid ičeze vägil.
Tuldes Kalagehe hän zavodi rata počtal. Möhemba radoi sekretarin Sel’skijas Sovetas, jäl’ges hän tegihe predsedatel’aks. Oli pämehen 26 vot i läksi pensijale. Siloi Kalagen školas zavottihe opeta vepsän kel’t. Valentina Grigorjevna tuli radmaha školha i radoi vepsän kelen opendajan nel’l’ vot.
"Kaik lujas navettihe händast. Hän om hiväsüdäimeline, aktivine, tark rados. Administracijas radoi lujas hivin. Paksus ajeli lidnha erazvuiččid azjoid, pagiži ristituidike, konz kanzoiš oliba miččed-se problemad i pidi abutada – käveli pertidme i abuti. Nügüd’-ki hänes jäi pämehen taba. Hän navedib abutada külänikiile, tegeb hivid azjoid, i se andab hänele hiväd mel’t. Hän jatktab ičeze eloted, pidäb hol’t voinan lapsiden tervhudes, naprib abutada pätta külän problemoid, miččed koskeba počtan radod, haugoid", – sanub Kalagen eläi Jevgenia Ivanovna Fotejeva.
Kacmata igäha, Valentina Grigorjevna Agafonova om aktivine ristit, hänel om äi energijad i sur’ taht abutada toižile. Vunukad da pravunukad lujas armastaba händast, a hän mil voib abutab heile.
Ozatelem Valentina Grigorjevnad čoman jubilejanke, toivotam vahvad tervhut, väged, ozad, läheližiden armastust!
