Тексты
Вернуться к списку
| редактировать | удалить | Создать новый
| Статистика
| ? Помощь
Kul’tuuran kehittämine: midä uuttu
Источник:
Oma mua. 2026. 07.10 (№ 39 (1829)). С. 2
Kul’tuuran kehittämine: midä uuttu
карельский: ливвиковское наречие
Новописьменный ливвиковский
Kandurahvahien kielien da kul’tuuran kehittämizen da säilyttämizen uvvet keinot oldih paginal Periodika-julguamos, kuduas piettih "pyöryžy stola" nimel "Kandurahvahien yhteiskunnallizien yhtymyksien parahat praktiekat da alguhpanot".
Pivos paginal oldih kaikis hyövyllizimmät keinot, kudamien vuoh säilytetäh da kehitetäh karjalan, vepsän da ven’an kielii da kul’tuurua Karjalan tazavallas.
Pivon vedäjänny oli Kanzallizen da alovehellizen ministerstvan ozaston piälikkö Jelena Migunova. Paginoin pidäjien keskes sai kuulta Vepsän kul’tursebran piälikön Larisa Čirkovan, Karjalan Rahvahan Liiton johtajan Anna Jakovlevan, Karjalan kul’tuuran Viena-etnokeskuksen piälikön Julija Filippovan da Kvartal-yhtymyksen piämiehen Mihail Tretjakovan.
— Kieldy da kul’tuurua pidäy kehittiä da säilyttiä kogonažuksennu da eri keinoloin vuoh: kirjoin painamal, vepsänkielizien paginoin kirjuttamal, nygyaigazien sähköpalveluloin kehittämäl da luadimal. Vihjuan vie, ku sidä suurdu ruaduo pidäy ruadua suurel joukol, sanoi vepsäläine Larisa Čirkova.
Karjalan Rahvahan Liiton piälikkö Anna Jakovleva kerdoi omassah järjestön projektois.
— Karjalazet perindöt teatrualaval -projektas opastimmo Teatrujoukkoloin piälikkölöi juuruttamah ozutuksih karjalan kieldy, perindölöi da taboi. Sen hantuzis piimmö kaksi festivualii — "Karjalaine suarnu" lapsih niškoi da "Piäroulis on Karjal" vahnembile. Painatutimmo paginsanakirjan teatrujoukkoloin rahvahile abuh. Kolmes piiris — Anuksen, Kalevalan da Louhen — piimmö karjalan kielen treningat. Rilsujem po-karel’ski -projektan tuloksennu luajimmo kymmene lyhytty videoroliekkua, kui oigieh sanuo karjalakse erähii sanoi, kui keksie karjalankieline nimi tavarale, brendale, palvelule, kui pidiä piäl karjalazii ruuttii, kerdoi Anna Jakovleva.
Pyöryžän stolan ruadoh yhtyi Karjalah ruadomatkah tulluh Krasnojarskan alovehen gubernuattoran sijahine Valerii Sem’onov.
— Meil on ylen tärgei Karjalan ruadokogemus, sendäh ku tiä on erinomaine tila, erinomazet tehnolougiet, kuduat annetah mahton yhtistiä kaikkien ruadoväit. Myö sežo hyväl mielel vastuammo teidy omal alovehel, ku voizimmo ozuttua omua kogemustu da kuulta teijän mielet sih nähte, midä vois parandua meijän ruavos, sanoi pidoh yhtynnyzii tervehtijes Valerii Sem’onov.
Projektoin vuoh yhteiskunnallizet liitot voijah yhtistiä ennevahnazet perindöt da nygözen aijan, panna yhteh ruadamah eri sugupolvien da ammattiloin rahvastu perindöllizen kul’tuuran da kielen säilyttämizekse.
