Тексты
Вернуться к списку
| редактировать | удалить | Создать новый
| Статистика
| ? Помощь
Aleksandra Lesonen.
Kuittijärven čuaritar toi onnie karjalaisilla
Источник:
Oma mua. 2026. 14.10 (№ 40 (1830)). С. 2
Aleksandra Lesonen
Kuittijärven čuaritar toi onnie karjalaisilla
карельский: собственно карельское наречие
Новописьменный севернокарельский
Šajekuun 10.–11. päivinä Kuittijärven rannalla Vuokkiniemen kyläššä mäni šuuri pruasniekka – Mujehen festivali.
Tilaisuon ohjelmašša oli kalaštajien kilpailuja, työpajoja, folkloriesitykšie, kielikenttä, jarmankka, herkkuruokua paikallisilta ravintoloiččijilta ta huvija koko perehellä.
Tänä vuotena festivalin piätapahtumah, mujehenpyyntikilpailuh ošallistu viisi joukkuo: "Hauvin lapšet", "Šeppä", "Karjalaiset", "Kižin porukka" ta "Avarušlentäjät".
Pruasniekan uattona, 10. šajekuuta kalaštajat lašettih jarještäjien antamie verkkoja, a šeuruavana päivänä lapettih niitä ta tultih rannalla pyyvvykšineh, jotta ošallistuo kilpailun tulijih vaiheih.
Šuurin pyyvvyš tuotih miehet Karjalaiset-joukošta. Hyö pyyvvettih yhekšän kiluo mujehta.
Joukot pantih verkot vuatoloih, a šiitä nopeuvella otettih mujehta pois verkkoloista. Šen jälkeh ošallistujat viessattih kalua ta kilpailtih šen puhistamisešša. Hyö puhissettih karjalaisittain – vain šormilla.
Kaikkien vaiheijen tulokšien mukah voitti Karjalaiset-joukko, toisella paikalla piäsi "Šeppä", a kolmannella tuli "Kižin porukka". Kižin porukka -joukkoh ošallistu niise yksi festivalin vetäjistä Marina Noženko. Kaikki joukot šuatih lahjat ta kunnivokirjat sponssoriloilta, a "Karjalaisilla" myönnettih piälahja – šähköšavuššušlaiteh. Miehet šanottih, jotta kilpailujen jälkeh ruvetah šavuštamah mujehta ta lohta.
Tänä vuotena festivalissa kävi tunnettu vieraš Tatjana Travnikova, kumpani valmisti mujehešta kolme epätavallista ruokalajie.
Tatjana Travnikova on Optimal’noje rešenije -yhtijön brändi-johtaja, Adskaja kuhn’a -šoun puolifinalisti, Konstantin Ijevlevin Angeli Šefa -projektin ta ChefsTeamRussiakeittäjäliiton ošallistuja.
Tatjana valmisti kolme luatijan ruokua festivalin vierahilla: mujehta aasijalaisešša tyylissä, mujehta venäläisittäin ta mujehta piharuuvvan muuvvošša. Festivali niin miellytti Tatjanua, jotta hiän iče halusi ošallistuo mujehenpyyntikilpailuh. Yheššä oman pojan kera hiän muuvvošti Avarušlentäjät-joukon. Hyö enši kertua elämäššä pyyvvettih mujehta verkkoloilla – heitä autto paikallini eläjä, kumpasella oli veneh ta kalanpyyntikokemuš.
Vuokkiniemen Mujeh-festivalista on tullun kylän brändi. Paikallisien eläjien lisäkši šiitä tiijetäh ihmiset Venäjän eri paikoista ta mielelläh tullah Vuokkiniemeh, jotta ihual’l’a Vienan Karjalan ilmapiirie ta mujehta.
– Šemmoset pruasniekat ollah esimerkkinä šiitä, mitein paikallini šeura kannattau Pohjois-Karjalan istorijua ta luatiu uušie turistiklasterija. Šemmoset paikalliset projektit kehitetäh kyläalovehie, on varma Karjalan talouškehitykšen ministeri Anton Fokin.
