Тексты
Вернуться к списку
| редактировать | удалить | Создать новый
| Статистика
| ? Помощь
Пехконен Маргарита.
Sähkökirjasto muamankielien opastajile abuh
Источник:
Oma mua. 2026. 14.10 (№ 40 (1830)). С. 3
Пехконен Маргарита
Sähkökirjasto muamankielien opastajile abuh
карельский: собственно карельское наречие
Новописьменный севернокарельский
Šokšun školan vepsän kielen opastai Gleb Fomin kehoitti luadimah sähkökirjasto, kudai olis muamakielien opastajile abuh. Kehoitustu kannatti Ven’an prezidentu.
Šokšun školan vepsän kielen opastai Gleb Fomin on varmu: muamankie lien opastajat tarvitah yhtehisty sähköpalveluloin kirjastuo. Moizen kehoituksen Fomin on luadinuh Ven’an prezidentan Vladimir Putinan da erilazien pedagougizien kilvoin voittajien kel vastavukses.
— Meil on olemas yhtehizii sähköresursoi, kudamii opastajat voijah käyttiä urokkoi pidäjes libo omii harjaituksii valmistajes. Kehoittazin luadimah Ven’an kanzoin kielien opastuskeinoloin kirjaston. Muamankielen opastandas on omii eroituksii. Opastai ruadau yksinäh da opastusainehistuo häi luadiu yksinäh. Sähkökirjastos myö luajimmo resursan, kuduas jogahine voibi suaja viritysty, kogemustu, neruo, kerdoi Fomin.
Karjalan opastajan kehoitus sai kannatustu da hyväksymisty valdivon piämiehes.
— Gleb Jurjevič, ozaitto oigieh! Kai on ihan muga! vihjai prezidentu.
Opastajan sanoin mugah mahto ezittiä oma kehoitus prezidentale rodih hänele tärgiekse.
— On hyvä mieles, ku kehoitus, kuduadu minä mietin, kuduadu piin tärgienny muamankielen opastamizekse, sai kannatustu korgiel tazol, sanou Fomin. — Minul on ylen tärgei, ku pagin on nygyaigahizis keinolois: sähköpalvelulois, kontentan luadimizes, tehnolougieloin käytös. Minun mieles juuri sih suundah nygöi pidäygi kehittyö, pidäy varmuttu mies.
Fominale hänen kehoituksen kannattamine on kaikkien niilöin kannattamine, ket ruatah muamankielien säilyttämizen da kehittämizen alal. Opastajan sanoin mugah kolleegat sežo pietäh hänen kehoitustu tärgienny.
— Opastajil meijän muan eri alovehilpäi on suitettu kogemustu da ruadoneruo. Kaikil ollah oma kieli, omat ruado-olot, ga probliemat ollah yhtenmoizet: kui olis livuttua lapsii kielen opastamizeh, kui luadie muga, ku muamankieli juurdus heijän jogapäiväzeh elaigah da kui käyttiä sih niškoi nygyaigahizii tehnolougieloi, kerdou Fimin. — Sikse on ylen tärgei ozuttua omua kogemustu, kerduo sih nähte. Äijät kolleegat ollah valmehet sih ruadoh, minägi olen valmis.
Šokšun školan opastai Gleb Fomin syvyskuus piäzi kogo Ven’an Muamankielen da literatuuran paras opastai -kilvan voittajakse.
— Voitto oli ihan vuottamatoi. Minä hyvin ellendin: kilbu on vagavu, ku kilbuniekois keskes oli nerokastu, lahjakastu opastajua Ven’an eri kolkispäi. Jogahizel heis on oma ruadokogemus da korgei nero. Sendäh tavoitin ozuttua omua ruaduo, omii kehoituksii, midä kehitän vepsän kielen opastamizes, en duumainnuh kilvan lopputulostu, mustelou Gleb Fomin.
Opastajien kilvas Karjalan opastai sai kuulta muan toizien alovehien opastajien ruadokogemukseh nähte.
— Kilvas olen nähnyh äijän uuttu keinuo da ellendin, ku tuttavatgi šeikat voibi ezittiä uudeh luaduh. Sendäh nygöi tavoitan enämbän käyttiä interaktiivizii harjaituksii, kižoi da sähköpalveluloi, kerdou Fomin.
— Vähäzel höpsevyin, konzu tulin järilleh omah školah. Vaste vai olin ymbäri Ven’ua tulluzien kolleegoin joukos, kilbailin heijän kel, a nygöi jo pollen oman kluasan kynnykses piäliči da jatkan tavallistu ruaduo.
Fominan sanoin mugah hänen opastujat tiettih, ku häi lähtöy kilbailemah da voitti kilvas, ga se nikui ei vaikutannuh heijän keskizeh yhtevykseh da opastundah.
— Kilvan jälles nimidä ei muuttunuh: lapset ielleh kävväh urokoile, kyzytäh, vastatah, harjaitellah, yhtytäh projektoih. Minun mieles se parahali ozuttau, ku heile tottutoven vepsän kieli on mieleh, sanou opastai.
Gleb Fomin jo kuvvettu vuottu opastau vepsän kieldy. Šokšun škola on enzimäine da ainavo hänen ruadokohtu.
— Školan loppiettuu minä piäzin opastumah Petroskoin valdivonyliopistoh baltiekkumerensuomelazen filolougien tiedokunnale, kus opastuin vepsän kieldy. Yliopiston loppiettuu tahtoi lujoittua suaduloi tiedoloin praktiekan avul, sendäh tulingi ruadoh školah, mustelou Fomin.
Ruadovuozien aloh nuori mies ellendi, ku opastandu on juuri hänen ruado.
— Minuu miellyttäy olla lapsien keskes, ruadua heijän kel, nähtä, kui hyö opastutah da nerovutah kieleh. Toinah, se on kaikis tärgevin opastajah niškoi, konzu ellendät, ku sinun opastettavu aineh on mieleh opastujale.
Nuorile opastajile Fomin kehoittas enämbän olemah lapsien keskes, kuundelemah heidy, ellendämäh, mi on heile mieleh, löydämäh moizii keinoloi, kudamien vuoh voibi siduo muamankieli lapsien elaigah.
— Pienigi idei aijan aloh voibi muuttuo suurekse hyväkse projektakse, sanou häi. — Toizekse ei pie varata opastuo kolleegois da aivin kehittyö. Kuvves vuvves, kuni ruan, minä iče äijäh opastuin da ellendän, ku opastajalgi ei sua azettuo, ainos pidäy opastuo. Semmite, konzu pagin on omas kieles, muamankieles — ainos on midä säilyttiä da kehittiä, vihjuau Fomin.
