Тексты
Вернуться к списку
| редактировать | удалить | Создать новый
| Статистика
| ? Помощь
Valentina Libertsova.
Artelilleh ruado eistyy
Источник:
Oma mua. 2026. 14.10 (№ 40 (1830)). С. 4
Valentina Libertsova
Artelilleh ruado eistyy
карельский: ливвиковское наречие
Новописьменный ливвиковский
Alavozen ruadoveteruanoin nevvosto uvvessah kerävyi kezän jälles. "Paha on ristikanzal, konzu häi on yksinäh. Hädä on yksinäzel. Yksi ei ole voittai", kirjutti ven’an runoilii Vladimir Majakovskii. Eläkkehel ristittyöt puaksuh jiähäh yksinäh. Kai konzu lähähizet ollah rinnal, nuoril täydyy omua dieluo da zobottua, ei ole kylläl aigua paginoih ijäkkähienke. Sit konzu ruavahat rahvas yhtytäh mittuzihgi mieldykiinittäjih pidoloih, elaigu zavodiu halvastamah uuzil värilöil. Alavozen ruadoveteruanoin nevvosto oli virrallizesti perustettu 10 vuottu tagaperin, sendäh, gu rahvas jo ruvettih tundemah, ku tahtotah olla yhtes. Nygöi nevvostoh kuuluu 22 hengie, pidoloih kävyy äijä enämbi. Konzugo heidy kučutah, ga puaksuh tullah omal himol. Net ollah enimytteh endizet puunhuavastuszavodan da muanruadajat. Hyö kannatetah paikkallizii pidoloi, kul’tuurutaloin pruazniekkoi, hyvitelläh toine tostu roindupäivienke, kävväh hyvittelemäh kodiloi myöte vie vahnembii ristikanzoi merkivuozipäivienke.
Alavozen ruadoveteruanoin nevvoston piälikkö L’ubov’ Erikson mielihyväl kerdou omii ruadoloi:
– Mulloi myö saimmo Prezidentan fondan grantan – 500 tuhattu rubl’ua, niilöih kohendimmo da čomendimmo vällän huonuksen kul’tuurutaloin luondalas. Azuimmo omal väil da panimmo stolat da skamn’at. Sie nygöi suau pidiä kerähmölöi, paginoi, vastavuksii, hyvitellä merkipäivienke. Keviäl da pruazniekoin iel yhtes školan da paikallizen haldivonke kabrastammo pihoi, otimmo ičele Zavodan uuličan da kuhkutimmo Pervomaiskoin uuličan eläjii pidiä kunnos oma eländykohtu. Paiči ruadoloi omas kyläs myö ylen äijäI suvaičemmo yhtes ajella teatruspektakliloih da kontsertoih Petroskoih, Lodienoile dai Anukseh, konzu sinne kengi tulou ozuttelumatkah. Vie suvaičemmo talvel ajella basseinoih, gu olemmo kazvanuh da elämmö Luadogan da Anusjoven rannoil, lapsusaijas harjavuimmo kezoidu kylbemäh. Liikundukul’tuurua myö sežo kunnivoičemmo da kannatammo. Jo seiččie hengie tovendettih GTO-normii, dostaliloil jäi pikoi vähäine, terväh kaikil rubieu läpettämäh ryndähil kuldaine libo hobjaine rynnäsmerki. Myö alalleh autammo valličuksien aigahgi, kengo tulou tarkastajakse, kengo on paikallizes komiisies.
Mennyöt, nygözet, tuliet aijat
Täl kerdua Alavozen ruadoveteruanoin nevvostoh kuulujat kerävyttih kul’tuurutaloih Ruavahien ristittyzien päivän pruaznieklah. Ku’’tuurutaloin piälikkö Ol’ga Bogdanova pidi kvest-kižan "Kus on lougiekku? Enne eläjien koudu", čuglahutti mennyzih aigoih, tavallizeh rahvahan kul’tuurah, kudai jatkuu meijän nygyaigazes elaijas. Sit kirjaston hoidai Natalja Mitrofanova pidi šuutkahizet arbajazet, ku jogahizel migi hienoine puuttus käzih lahjakse. Čuajut magieloin piirualoinke lämmitettih jo viluttaval sygyzypäival da kehoitettih paginoih.
A sit rahvas r uvettih šeikkuimah, kui olis parembi vastata da pidiä tulien vuon puunhuavastuszavodan 100-vuodehine da paikallizen souhozan 95-vuodehizen merkipäivät. Alavoizen taigin -teatrustuudii tänävuon ozutti Nikolai Zaitsevan kerdomuksen pohjal luajitun Tagavozilaine-spektaklin, sen varustajes kerävyi kuda-midä zavodan ruadovehkehty, fotokuvua, ruadosobua, pilomaterjualua, mustostu – kai net vois käyttiä meijän uuttu muzein zualua luadijes da ližäkse kerätä, midä kel vie on tallel zavodan talolois da perehis. Souhozaspäi uskaldettih kerätä kummallistu mustokerdomustu, niis myö keksizimmö uvven spektaklin. Piätettih erähiči kerävyö da paista sih niškoi tarkembah.
Kyykkä-kriukku keriäy yhteh
Školan stadionale kerävyttih karjalazen kyykä-kižan suvaiččijoin joukot Tuukses, Videlespäi, Alavozen ruadoveteruanoin nevvosto keräi kaksi joukkuo. Uvvet ozanottajat tuldih Nurmoilan kellozet-TOS:späi. Sih joukkoh yhtyigi Inga Gurilova, Karjalazien kerähmön vallittuloin nevvoston piälimäine. Heijän joukko muga kiihakosti vedeli miäččyy kižas, ga azuo tervehys sai vai, konzu se loppih. Inga Nikolajevna, tiettäväne, kerras rubei ajattelemah, ku pidäs tämä perindölline karjalazien kyykkäkiža nostua ammatillizele tazole, enzimäzikse luadie putilline lagevo kižuandah niškoi. Heinävynnyh da tuhjovunnuh školan stadionu ei tulluh mieldy myö toizilegi kižuajile. Alavozen ruadoveteruanoin nevvostoh kuulujat uskaldettih panna se vähäzel kundoh, konzu tullah erähäči harjaituksile.
Kyykkä-kilvan ruavot vuvves 2019 algajen ollah Valerii Kutsabovan piän al, häi on ylen äijäl kiinostunnuh liikundukul’tuurah. Kuni kahtel paikal kilbailtih kriukkuh, Valerii Ivanovič varusti vuottajile eriluaduzet toizien kanzoin kižat, kudamat ollah pädevät ijäkkähile. Myö sil aigua pagizimmo Anuksen piirin ruadoveteruanoin nevvoston piälikön Margarita Prohorovanke. Inehmine sežo jo duumaiččou, kui kannat-
tua Alavozen pruazniekkoih, midä vie vois azuo rahvahan hyväkse piiris. Se on tozi, gu yhtes voibi azuo enämbi. Sanotahhäi karjalazet – artelilleh ruado eistyy!
Kilvas voittajikse puututtih sportuiččijat Videlespäi, toizel sijal roittihes alavozilazet, kolmas sija juattih Tuuksen da yhtehine Koverin-Nurmoilan kyykkärilöin joukot.
