Тексты
Вернуться к списку
| редактировать | удалить | Создать новый
| Статистика
| ? Помощь
Jalovitsina Svetlana.
Meijän perintehet -projektin rinnakkaiset vaikutukšet
Источник:
Oma mua. 2026. 21.10 (№ 41 (1831)). С. 4
Jalovitsina Svetlana
Meijän perintehet -projektin rinnakkaiset vaikutukšet
карельский: собственно карельское наречие
Новописьменный севернокарельский
Tämän vuuvven 1. heinäkuuta Karjalan tašavallan piämiehen granttišiätijön tuvella starttasi Uhut-šeuran Meijän perintehet: ymmärtämini, omakšumini, uuvvistamini -nimini projekti.
Aloteh on šuunnattu karjalaisien perintehien popularisointih ta kulttuuriperinnön šäilyttämiseh. Piätarkotušryhmä on Kalevalan nuoret ta keški-ikäset perehet. Heitä varoin vietetäh työpajoja, kumpaset levennetäh tietoja karjalaisešta kulttuurista kanšallisen keittotaijon, musiikin, pelien ta taijon alalla.
Uhut-šeuran jäšenet šiännöllisešti julkaissah omah VK-ryhmäh tietoja ošallistujien perehien vaštautumisista. Šamoin tiijon ta järještelyn alalla auttau projektin partn’ori – Kalevalatalo-etnokeškuš alottehen koordinattorin Nadežda Vasiljevan joholla.
Täššä muistihpanošša haluosin kertuo erähistä rinnakkaisista vaikutukšista, kumpaset ilmeššyttih ympäri projektie. Še vetäy mukah eri ihmisie ta järještöjä, kumpaset kiinnoššutah karjalaisen kulttuurin kehittämiseštä.
Joukko vietti enšimmäisen tilaisuon elokuušša 2026. Še näytti, jotta ošallistujien perehien miäryä koškijat epyälykšet oltih perättömät. Kaččomatta marjakauteh, viluččaiseh šiäh ta maholliseh vihmah kisoih keräyty äijän lapšie ta aikuhisie. Kirkkahakši ta luonnollisekši tilaisušlisäkši tuli Šuomelais-ugrilaisien kanšojen liiga -kanšalaisjärještön valmistama Karjalan kanšojen ruuvvat -näyttely. Onnekši niinä päivinä šitä esiteltih Kalevalašša.
Kisojen mukah ošallistujat piätettih, jotta projektin aihe kiinittäy mieltä šekä meijän pos’olkašša jotta šen ulkopuolella. Karelija-TV- ta ratijovaltijoyhtijö luati videon projektin alušta. Šen valmistamiseh ošallissuttih kuvuaja ta journalisti Kalevalašta.
Projektin ekspertin Žanna Tikkasen viettämät enšimmäiset työpajat herätettih mielenkiintuo ošallistujilla ta Kalevalan Kulttuuritalon piirrošfilmistudijolla. Toivomma, jotta tulou piirrošfilmi kyykkä-pelistä.
1990-luvulla Vladimir Denisov ehotti peruštua kyykkäjoukon. Niiltä pelin veteraniloilta, ket šilloin kannatettih še ideja, alettih kerätä muisselmie ta eččie uušie tovissukšie, valokuvie ta ihmisie, ket halutah šäilyttyä še šivu Kalevalan istorijah. Natalja Šaton nauhotti audiomuisselmie Anatolii Lesoselta, Gennadii Filippovilta, Marija Lesoselta, Vera Ivanovalta, Dmitrii Saburovilta, Anatolii Nikonovilta, Žanna Tikkaselta. Niih kertomukših pohjauvutah uuvvet kyšymykšet kyykäštä Kalevalan mualla ta uuši istorijallini ečintä.
Taijon šuunta projektin rajoissa kehittyy Valentina Saburovan joholla, mi autto järještyä yhteyttä Karjalan kanšalliseh teatterih, missä pitälti ruato Kalevalan mualla šyntynyt Neuvošto-Karjalan kanšanartista ta Venäjän Federatijon anšijoitunut artista Vieno Kettunen (Mikšijeva).
Lähikuukaušina lapšet ta aikuhiset ošallistujista perehistä tutuššutah Vieno Grigorjevnan tuotantoh, a yhteistyö Karjalan kanšallisen teatterin kera antau nähä ta kuulla hänen audio- ta videonauhotukšie. Kaččojat erikoisešti tykätäh hänen šemmosie roolija kuin Lemminkäisen muamo (Kalevala), Anni (Antti Timosen Otatko miut Karjalan mua? -näytelmän mukah), Taina (Laukunkantajat), Boabo (Lembi), Loviisa (Niskavuoren naiset) ta muita töitä.
Kalevalan ošakunta Petroskoissa ehotti ikuistua meijän tunnetun muanmiehen muisson ta ašettua Vieno Kettusen muistotaulun Kalevalan pos’olkah.
Projektin kolme kuukautta näytti, jotta šen ideja innoššuttau šekä ošallistujie jotta eri ihmisie, kumpasilla on eri ikä, statussi, koulutuš, harraššukšet, a šanoih "ymmärtämini", "omakšumini", "uuvvistamini" pitäy lisätä šana "vetovoima".
