Тексты
Вернуться к списку
| редактировать | удалить | Создать новый
| Статистика
| ? Помощь
Bogdanova Natalja.
Kalevala: suguvastavundu karjalakse
Источник:
Oma mua. 2026. 21.10 (№ 41 (1831)). С. 5
Bogdanova Natalja
Kalevala: suguvastavundu karjalakse
карельский: ливвиковское наречие
Новописьменный ливвиковский
Kalevalan keskiškolan viijenden da kuvvenden kluasan 41 opastujua yhtyttih pidoh, kuduan nimi oli "Karjalazilluo gostih".
Projektujoukon rahvas da kalevalalazet lapset kerras hyvin sovittih: lapset tarkah kuunneltih paginoi, ei paheksittu väzyndiä. Pivon aigahhäi oli pietty kogonazet kolme urokkua luvendat da kižat.
Anuksenkarjalazet-liiton projektah yhtynyöt enimite ollah liygiläzet, hyö toizeh luaduh iännetäh karjalazii sanoi. Sendäh runonpajattajien mualoile kerävyjes projektan rahvas vagavah valmistuttih, vaihtettih stsenaarien liygiläzet virkehet vienakse. Ku kerduohäi vienalazile lapsile karjalazeh kul’tuurah nähte, ga heijän omah kieleh – vienakse.
Pivos oli kaikkie. Paginua oli perindöllizis nerolois da tavois – net ollah yhtehizet kaikil karjalazil murdehih da paginluaduloih huolimata. Yhtes lapsien kel šeikuittih paikannimilöin alguperiä. Ylen äijäl lapsii miellytti, kui erähän versien mugah sellitetäh, kuspäi on tulluh Kalevalan čupul olijan Luusalmi-kylän nimi. Äijät lapset enzi kerdua kuultih, ku konzulienne ammui sie torattih karjalazet da ruočit da Keski-Kuitin da Ala-Kuitin välizen salmin pohju oli täyzi luudu.
Karjalazien ruutien ombelii Margarita Kemppainen kerdoi karjalazih sobih nähte. Lopus lapsile saneltih karjalazien suusanallizes runohuos – suarnois, sanapiälöis, arbaituksis.
Ei kai pivos olluot lapset opastuta karjalan kieleh, sendäh nuorimile oli valmistettu kaksi harjaituksien variantua: lapsii juattih kahteh joukkoh – kielentiedäjät da kielensuvaiččijät. Kieldy opastujat suadih kartočkat, kudamis sai lugie vienankarjalastu arbaitustu. Kai arbaitukset – ven’akse dai karjalakse, lapset arvattih oigieh da suadih magiet lahjat.
Projektan pido oli kui ad’voih käyndy, kaikil oli hyviä mieldy da rahvas erottih, kui omat rouno.
– Passibo suuri teile miellyttäjäs da hyövyllizes pivos lapsih niškoi. Lapsile dai vahnembile se rodih mieleh, sanoi projektalazile Kalevalan keskiškolan varapiälikkö Ol’ga Bobrovskaja.
Projektua "Luadogas Vienanmereh suate" todevuttau Anuksenkarjalazet-liitto Prezidentan grantufondan kannatuksel.
