Тексты
Вернуться к списку
| редактировать | удалить | Создать новый
| Статистика
| ? Помощь
Irina Sotnikova.
Kalages avaitihe muštpacaz min’oroiden muštoks
Источник:
Kodima. 2026. № 10 (403). С. 1
Irina Sotnikova
Kalages avaitihe muštpacaz min’oroiden muštoks
вепсский
Младописьменный вепсский
30. sügüz’kud, Karjalan päzutandan päiväl, Änižröunan Kalag’-küläs mäni tärged aigtego – avaitihe muštpacaz min’oroiden muštoks. Sijaližed eläjad pit’kha varastiba necidä päiväd.
Muštpacaz om pandud Kalagen kul’turpertinno läz muzejad-pertid Anna Lisicinan muštoks. Se om omištadud neiččile da prihoile, kudambad Suren Kodiman voinan jäl’ghe puhtastiba sijaližid vepsläižid territorijoid minoišpäi. Muštpachan avaidusele kerazihe äi rahvast: tuliba sijaližed eläjad, veteranad, adivod susedkülišpäi da Petroskoišpäi.
Muštpachan tegemižen tomotai om "Šoutjärvelaine" -ecindjoukun ohjandai Viktor Lonin Šoutjärvespäi. Hän tariči Kalagen administracijale panda muštpachan – muga idei tuli eloho. Memorial om tehtud "Čornii kamen" -radišton abul.
Voinan jäl’ghe min’oroikš tegihe 97 mest, heiden keskes oliba 15-17 voččed prihad da neiččed. Opendusen jäl’ghe hö ščupad vai pit’käd kalud raudagjoidenke kädes eciba minoid Šokšuspäi Kaskezahasai. Ku löutihe min, pandihe rusked flagaine i jättihe se tedomahtoižiden sap’oroiden täht. Nece rad mäni kuverz’-se vot, se oli lujas jüged.
– Konz suomalaine armii läksi meiden agjaspäi, se jäti äi minoid. Ned oliba pöudoil, rosanikoil, tropaižil, marjžomiš, nituil, mecdorogoil. A ved’ armii astub vaiše tedme. No minad oliba kaiktäli, eskai pertidenno. Eläjad varaižiba lähtta pertišpäi, kuni ei tulnugoi sap’orad. Puttes minoile koliba vanhad, lapsed, naižed, – starinoičeb Viktor Lonin.
Äjad küliden eläjad putuiba minoile i koliba, äjad oli ranitud. Vepsläižiden küliden vanhad eläjad muštaba sen aigan, konz oli opak lähtta irdale:
– Gerasimovoiden kanzas oli viž last. Mam susedanke läksiba varasijaha kacmaha kartofinad, a sigä oli min – molembad koliba, lapsed jäiba mamoita, – johtutab Kalagen eläi Valentina Mironova.
Konz tuliba sovetskijad saldatad, jo zavottihe ecta minoid, no kaiken-se pöudoil koli äi ristituid. Sen taguiči pättihe tehta joukud, miččed puhtastaškandeba meiden mad minoišpäi. Šoutjärves oli tehtud koume joukud, miččihe mülüiba sijaližed neiččed da prihad. Hö tegiba jügedan radon, äjad koliba tehtes tegendad.
Nügüd’ neniden noriden min’oroiden urohontegod igäks jäba Kalagen külän istorijaha. Nece om mušt noriden neiččiš da prihoiš, heiden rohktudes da armastuses kodiröunaha.
