Тексты
Вернуться к списку
| редактировать | удалить | Создать новый
| Статистика
| ? Помощь
Galina Baburova.
Paginad vepsän kul’turas
Источник:
Kodima. 2026. № 10 (403). С. 3
Galina Baburova
Paginad vepsän kul’turas
вепсский
Младописьменный вепсский
Sügüz’kun lopus Kantelen kodiš mäni vepsän rahvahale omištadud konferencii "Vepsläižed starinad". Sen pätegendan om vepsän kul’turan popul’arizoitand noriden mehiden keskes.
Konferencii pidetihe ühtennimižen projektan aigan. Projektad tegeb "Kul’turan kehitoitandan liga" Karjalan Pämehen grantoiden fondan rahatugel.
Dokladoidenke "Vepsläižed starinad" -konferencijal eziniba Karjalan Tedokeskusen radnikad – tedomehed, kudambad oppiba vepsläižid tradicijoid, veroid da fol’klorad. Mugažo ičeze tedoil da mahtištol jagoihe Karjalan Rahvahaližen teatran artist Aleksandra Aniskina da "Kantele"-ansambl’an artistad, kudambad äi vot kaičeba da popul’arizoitaba vepsän kul’turad ičeze rados.
Zavodihe-ki konferencii "Kantele"-ansambl’an "Aino"-pajogruppan ezitusel. Artistad pajatiba "Ala voika-se, Mašaine" da "Rusked heboine" -pajod. Sid’ Petroskoin universitetan vepsän kelen opendai, filologijan tedokandidat Maria Košeleva starinoiči kundlijoile vepsläižiš: mitte rahvaz nece om, kus se eläb, miččel kelel pagižeb, mitte om rahvahan lugumär. Pidab sanuda, miše kundlijoiden enambišt oli norid mehid. Äjiden täht heišpäi nece informacii oli uz’.
– Olen mugošt mel’t, miše Venäman rahvahiden ühtmuden voden om lujas tärged vahvištoitta sidod sugupol’viden keskes, om tärged sirtta norile sugupol’vile tedoid, miččed om kaitud nügüdehesai, – sanui projektan pätegii Aleksandra Aniskina.
"Vepsläižed starinad" -konferencii sünduti melentartušt norištol. Nored mehed tegiba äi küzundoid ezinijoile, surel ihastusel ühtniba paginoihe.
Äi küzundoid sünduti filologijan tedodoktoran Nina Zaicevan ezituz. Nina Grigorjevna starinoiči vepsän kelen erigoičusiš da siš, kut hän valiči vepsän kelen oppindan ičeze elon päazjan. Vepsän rahvahan fol’kloras da sen oppindas starinoiči Karjalan Kelen, literaturan da istorijan institutan radnik, istorijan tedokandidat Zinaida Strogalščikova. "Vepsän kul’tursebran" pämehen Larisa Čirkovan ezituz oli omištadud vepsän rahvahan mifologižile hengile. A lopihe konferencii dokladal, miččes vepsläine aktivist, Karjalan arvostadud artist Aleksandra Aniskina starinoiči, mil vepsläižed voiba ülendadas. Hän johtuti kaikile, miše Šokšus om üksjäine mirus sija, kus sadas babarmmujušt kvarcitad, starinoiči tetabiš vepsläižiš kivimastariš da savitegeližudes, vepsläižes eposas da "Kodima"-lehteses, Rürik Loninas da Šoutjärven etnografižes muzejas, tetabas Vepsän rahvahan horas, pühäs Aleksandr Svirskijas, Sovetskijan Sojuzan gerojas Anna Lisicinas da äjas toižes.
Mugažo "Vepsläižed starinad"- konferencijan aigan ühtnikoiden täht "Kantele"-ansambl’ tegi kargun mastar’-klassan, miččel openzi erasihe kargun likundoihe paroiš. Lopihe konferencii "Kudenikad koumikoiš" -kargul, miččen ičeze aigan pani scenale tetab vepsläine horeograf Vasilii Kononov.
