Тексты
Вернуться к списку
| редактировать | удалить | Создать новый
| Статистика
| ? Помощь
Irina Sotnikova.
Elä igän, vepsläine pajo!
Источник:
Kodima. 2026. № 10 (403). С. 4
Irina Sotnikova
Elä igän, vepsläine pajo!
вепсский
Младописьменный вепсский
Nece voz’ Vepsän horan täht om eriline – sille täudub 90 vot. Voden aigan mäneba erazvuiččed azjtegod horan jubilejaks. Ned om omištadud bohatale horan istorijale, sen lahjakahile ohjandajile da rahvahan pajole, mitte ühtenzoitab sugupol’vid.
Necil kerdal Šoutjärven vepsläižes etnografižes muzejas mäni vepsläižen pajon praznik "Minun däl’gidme asttas"-nimel. Ei muite vastusen täht valitihe muzei – nece om vepsän kul’turan südäin! Vepsän rahvahan hor da Šoutjärven muzei oma vanhad sebranikad, miččed ühtes kaičeba vepsän rahvahan kel’t da tradicijoid.
Vastusele kerazihe muzejan sebranikad, külän vanhad eläjad, openikad opendajidenke, oliba ned-ki, ked ezmäižen kerdan tuliba muzejaha. Adivoile starinoitihe horan istorijan polhe, enččiš pämehiš, repertuaras, mil hor eläb nügüd’. Praznikal johtutadihe kaikid, ked ei antkoi sambuda vepsän pajole. Zalas kuluiba eläbad äned, čoma muzik da pajoid, miččid ende pajatadihe kanzoiš.
– Praznik oli lujas čoma, läm’ da vessel. Kaik adivod ol’d’he hiviš meliš. Hor kerazihe, ozutelusel starinoičim horan polhe, mišpäi kaik zavodihe. Muštlim Vasilii Kononovad, mugažno Rürik Loninad, kudamb kerazi fol’klorad i oli muzejan pämehen pit’kha aigha, a vozil 1957-2001 hän oli horan ühtnikan. 90 vott om pit’k matk, neniden voziden aigan hor kaičeb vepsän ravahan pajoda kargkul’turad. A ved’ ende pajon tradicii perehiš kaiken eli. Mö kaiken pagižem siš, miše nece tradicii pidab kaita perehiš. A vastusen lopus mö kaik ühtes pajoim "Eli Griška" -pajon, – sanui muzejan pämez’ Natalja Anhimova.
Vastusen aigan kuluiba armhad vepsläižed pajod, miččed ühtenzoitiba kaikid tulnuzid da lämbitiba ristituiden hengid. A noriden äned völ kerdan todenzoitiba – vepsläine pajo eläškandeb da kuluškandeb völ pit’kha.
