Тексты
Вернуться к списку
| редактировать | удалить | Создать новый
| Статистика
| ? Помощь
Irina Sotnikova.
Šoutjärven kazvatajad čudutoitiba žürid
Источник:
Kodima. 2026. № 10 (403). С. 8
Irina Sotnikova
Šoutjärven kazvatajad čudutoitiba žürid
вепсский
Младописьменный вепсский
Šoutjärven lapsiden päivkodin kollektiv todišti, miše lahjakaz mez’ om mahtokaz kaikiš azjoiš.
Änižröunan lapsiden päivkodiden kazvatajiden täht tehtihe "Lahjavuziden jumalanbembel’" -konkurs. Se oli omištadud Kazvatajan päiväle da Lapsiden päivkodin opendusen vodele. Konkursan ühtnikad voibištelihe vides nominacijas. Heile pidi ozutada erazvuiččid nomeroid: pajatada, kargaita, lugeda runoid, ozutada teatrozutusid vai väta rahvahaližil vändimil. Konkursan ühtnikoiden keskes oli Šoutjärven lapsiden päivkodin kazvatajiden jouk-ki. Se sai koume ezmäšt sijad. Konkurs mäni online-formatas.
– Šuutarven lapsiden kodin kollektiv ühtneb konkursaha d’o toižen voden. Se ühtenzoiti meid völ lujemba. Hiviš meliš repetiruim, voumičemoiš konkursaks. Mö kargaižim, pajatim, ozutim scenkan, a miide muzikradnik L’ubov’ Vladimirovna Kiprijanova iče kirjut’ runon da lugi sen. Mugoižed konkursad andaba hivän voimusen ozutada ičtain toižes polespäi, lahjoita ihastust ičelein da kacujile, – sanui Šoutjärven lapsiden päivkodin kazvatai Ol’ga Kokorina.
Šoutjärven lapsiden päivkodiš radab üks’meline da sädai kollektiv. Kazvatajad lujas navediba lapsid, andaba heile ičeze armastust, lämäd, pidäba hol’t heiš, kut toižed vanhemad. Nece om sija, kuna tahtoiše pörttas.
Necil lapsiden päivkodil om melentartuine istorii. Sigä penespäi igäspäi lapsid mel’dütoittas vepsän rahvahan kul’turaha da tradicijoihe, opetas navedimha kodiröunad, kaičemha ičeze jurid.
Mö ozatelem kollektivad vägestusenke, toivotam hengen libutandad da uzid satusid rados!
