Тексты
Вернуться к списку
| редактировать | удалить | Создать новый
| Статистика
| ? Помощь
Pehkonen Margarita.
Čukeldajat pal’l’astettih Oniegan peitot
Источник:
Oma mua. 2026. 28.10 (№ 42 (1832)). С. 3
Pehkonen Margarita
Čukeldajat pal’l’astettih Oniegan peitot
карельский: ливвиковское наречие
Новописьменный ливвиковский
Karjalah käynnyöt čukeldajat löyttih Oniegan pohjas eri vuozisavoin aigah uponnuzii venehii da laivoi. Löydölöin joukos on 1700-luvul luajittu purjehalus, kuduas on kaksi mačtua.
Vaste vai järven pohjas nossuh čikeldai ozuttau omii löydölöi: häi löydi Oniegas vanhua kolikkuo – den’gastu. Kolikot löyttih kaksimačtahizes purjehvenehes, kudai luajittih 1700-luvul.
— Lövvimmö venehen vahingoittumattomannu, vai mačtat ollah vähäzel vinos. On harvinaine lykky löydiä moine vahnu laivu tävvelleh. Veneh on säilynyh Oniegan vien ominažuksien periä: vilu vezi on erinomaine puun säilytysaineh, pidäy varmuttu tutkimusmatkan järjestännyön čukelduskluuban edustai Stanislav Trofimov.
Čukeldajat luajittih venehen miärävykset da piettih tarkastuksen.
— Venehty sydämespäi ei vie tutkittu. Se on tulieloin tutkimuksien ruado, kerdou Trofimov.
Purjehveneh ei ole ainavo čukeldajien löydö. Oniegan pohjas on löytty paiči sidä nevvostoliitonaigaine Volgo-Balt-seerien laivu.
— Löytty veneh uppoi 40 vuottu tagaperin keviäl vuvvennu 1986. Se jäi jiän vangikse da Oniegan jiät ahtistettih sidä da murendettih, kerdoi čukelduskluubu ven’alazele uudizien da blog-kanualale Dzen.
Kluubu ilmoitti kuvves löytys venehes da laivas, ga Trofimovan mugah tutkimusmatku toi äijiä suuremban tuloksen.
— Tiettäväine, uponnuzii venehii löydyi enämbi, ga erähii niilöis ei voidu tarkastua hyvin siän periä. Erähii laivoi ei ehtitty tutkie, ku tutkimusmatkan aigu oli rajoitettu, sellittäy Trofimov.
Tämänvuodehizes matkas čukeldajile rodih enzimäine kogemus Oniegal. Viijen päivän aigah čukeldajat enämbän 30 kerdua čukeldettihes vedeh.
— Ruado-olot Oniegal ollah jygiet: vezi on vilu da nägyy vien al ylen pahoi. Sendäh ruadua sit järves voijah vaigu kogenuot čukeldajat da tovellizet šeikkailijat, vihjuau Trofimov.
Vaigevuksih huolimata čukeldajil lykysti luadie löyttylöin venehien da laivoin kuvat da videot.
— Valokuva- ja videodokumentat ollah tutkimusmatkan tärgevimii vaihieloi, kudamien jälles voimmo arhiivoin avul sellittiä löyttylöin venehien da niilöin merimiehien ozan. Parahite luajittavannu on uponnuzis laivois kerdoi dokumentufil’mu, kerdou Trofimov.
Karjalan vezis löydyy artefaktua
Oniegan tutkimusmatku ei olluh čukeldajile enzimäine ruadokogemus Karjalan vezistölöis.
— Olemmo käynnyh Karjalah joga vuottu vuvves 2018 algajen, kerdou čukelduskluuban edustai Stanislav Trofimov.
Enne tädä matkua tutkimukset koskiettih enimite Luadogan Karjalua. Kai Karjalan-matkat lahjoitettih čukeldajile erilazii artefaktoi. Elokuus vuvvennu 2020 hyö nostettih laivas salvatun maidobutilkan, kudai oli olluh vies enämbän 80 vuottu. Kezäl vuvvennu 2023 Luadogan pohjas löydyi vanhua maidobutilkua, Ruočis valmistettuu ast’ettu da Suomes valmistettu lihanpilkoimelliččy.
— Ližäkse lövvimmö silloi venehes hobjuluzikan. Tämä on enne vuvven 1917 vallankumovustu Ven’al valmistettu luzikku. Löydölöin joukos oli sanakse bronzas luajittu čainiekku, mustelou Trofimov.
Kolme vuottu tagaperin löytyt vehkehet työttih Valamoin manasterin muzeih.
