Тексты
Вернуться к списку
| редактировать | удалить | Создать новый
| Статистика
| ? Помощь
Valentina Libertsova.
165 vuvves läbi nygyaigazeh luaduh
Источник:
Oma mua. 2026. 04.11 (№ 43 (1833)). С. 2
Valentina Libertsova
165 vuvves läbi nygyaigazeh luaduh
карельский: ливвиковское наречие
Новописьменный ливвиковский
Tänävuon Alavožen škola täyttäy 165 vuottu. Allus se oli kirikön prihodan opastuslaitos, opastumah käydih vai brihačut dai hyögi ei joga päiviä. Kahtendenkymmenenden vuozisuan lopul se kuului kaikis suurimih Karjalan kylien školih, kuduah kävyi enämbi tuhattu lastu. Nygöi školas opastuu 310 hengie da ruadau 48 opastajua, kuduat eletäh nygyaigazeh tabah. Merkipäiviä vastates lapset dai vahnembat azuttih suuret ruavot, piettih vastavukset, varustettih suuri kontsertu.
Varustundu školan merkipäiväh on kazvatandukeino
Ei ammui Orl'ata Rossii -liittoh otettih uuzii pienii liittolazii, ruadau Enzimäzien liikeh, annetah abuu nuoret volont'ourat. Kaksi kerdua školan Mix-teatru puutui Karjalan suarnu -festivualin voittajakse. Vaste vai piirin tazol pietys Glagol-kilvas puututtih voittajikse kolme tyttösty. Mostu hyviä tulostu voibi vie äijän luvetella.
Jo opastusvuvven allus suurih hierun sygyzyruadoloih huolimata nygyaigazet Alavozen školan opastajat, opastujat da heijän vahnembat zavodittih varustumah 165-vuodehizeh merkipäiväh. Školan VK-sivul yhtytiedy ilmestyi uudistu, kui lapset tutkitah histouriedu, kučutah vastavuksile omii vahnembii da opastajii, kuduat loppiettih školan, kuunnellah mustelmii, kyzelläh. Kolmandes kluasas oli kai online-vastavus vuvvennu 2002 loppenuon da nygöi Petroskoin enzimäzes litseis johtajan sijähizennu ruadajan Jekaterina Libertsovanke.
Toven sanuo, Alavozen školan opastujien keskes on äijy kuulužua ristittysty: kanzallizen televiidenien johtajan sijahine Ol’ga Kuz'mina, Karjalan Sanomat -lehten toimittai Marina Tolstih, yliopiston filolougien kandiduattu Natalja Šubina, Alavozen kul'tuurutaloin johtai Ol'ga Bogdanova da toizet. Iče školan piälikkö Ol'ga Onojeva loppi školan 1998 vuvvel da yliopiston loppiettuu yhteh palah ruadau tiä. Enimät ruadajat da jo eläkkehele lähtenyöt opastajat da päivykoin kazvattajat sežo ken konzugi loppiettih oman kylän školan. A gu ottua vie lapsien vahnembat, sit voibi toven sanuo – tämä taloi on yhtenäine suuri pereh, kuduadu voibi ylbeillä, kuduan jytyi voibi eliä da ruadua oman muan hyväkse.
Pruazniekku tunduu jo huonuksis
Pruazniekakse ižändät da emändät čopakosti čomendetah huonukset. Vahnembien kluasoin opastujat riputettih ezizualan seinäle Školan eloksen kadrat -fotokuvien ozuttelu, kuduas suau nähtä, mittuot eri vuozin oldih kluasat, kiinnostukset, perindöt, kilvat, ajelendat. Seinän ies alalleh pyörittih lapset, vahnembat dai jälles gost'at, ečittih tuttavii, ovvosteltih, ihasteltihes. Rinnal on toine suuri lapsien piirustuksien ozuttelu – Minun škola.
Pruazniekkuzualan edeh on azetettu enneaigaine partu da vahnat opastuskniigat. Sai nähtä kluasoin fotokuvien al'bomat, pionieroin gornu, baraban, flagu. A niilöin piäl – erillizeh voinuoperatsieh kuolluzien urholoin fotokuvat, heidy unohtua ei sua, hyö nygöi ollah kois…
Hyvittelendät da palkindot
Pruazniekkuprogrammu oli azuttu muga, rounoku lennimmö lendokonehel da mustelimmo vuozii da tapahtumii. Pivon vedäjinny, tiettäväine, oldih kaksi st'uardessua – sizärekset Alevtina Jefimova da Anastasija Mantsvetova, nuoret, kaunehis sinizis ruutis, mollei ruatah školas. Enzimäzekse tervehtii kaikkii da andoi omat kiitoskirjazet suurele opastajien joukole školan piälikkö Ol'ga Onojeva. Sit annettih sananvuoro Anuksen piirin opastunduozaston johtajale Vera Fominale, kudai andoi käzih opastajile piirin piälikön da Karjalan opastanduministerstvan kiitoskirjazet. Vie hyvittelemäh tuldih Anuksen ližäopastuskeskuksen puoles Iloine-kandelehjoukko omien opastajienke, Alavozen haldivon piälikkö Natalja Arhipova, Alavozen kul'tuurutaloin piälikkö da školan vahnembien nevvoston piälimäine Ol'ga Bogdanova, Videlen školan johtai Antonina Stepanova, vuvvennu 1982 školanloppijoin suuri joukko, enimil kudualois jo vunukat kävväh omah školah.
Hyvittelijiöin keskes lapset hyväs mieles ezitettih varustettuloi tansiloi, pajoloi, pienii ezityksii školan elaigah, histourieh da mustoksih nähte. Kai iče "Musto-feja" puutui lapsile vastah pölyhizel vuiškal vahnoin kluasanpäivykirjoin keskes. Ehki nägyi, mittumat nerokkahat ollah Alavozen opastujat, kui suvaijah omua opastundutaloidu!
Pruazniekan ohjelmua čomendettih merkipäiväkse školas kuvatut videot: uudizet, pagizutandat. Oli hyvä mieli nähtä, kui uvvet keinot ollah maltajien lapsien käytös. A heil himoittas, gu oldas vie parembat muuzikkuapparatuurat, vie uvvembat keinot, čomembat huonukset! Anna vai toivotukset mennäh todeh! Kebjiedy opastundua dai uuttu tulostu, voittuo, iluo da kaikenluadustu mieldykiinnittäjiä ruaduo, armas škola!
