Тексты
Вернуться к списку
| редактировать | удалить | Создать новый
| Статистика
| ? Помощь
Irina Zaitseva.
Tulovaisuon johtajat vierailtih Periodikašša
Источник:
Oma mua. 2026. 04.11 (№ 43 (1833)). С. 3
Irina Zaitseva
Tulovaisuon johtajat vierailtih Periodikašša
карельский: собственно карельское наречие
Новописьменный севернокарельский
Mukavissa työpajoissa Petroskoin 2. koulun opaštujat tutuššuttih Kipinä-kuvalehen toimittajan työh ta čukelluttih karjalaisien perintehien muailmah.
Periodika-kuštantamon ruatajat otettih vaštah 2. koulun opaštujie, Tulovaisuon johtajat -leirin ošallistujie.
Oma Mua -lehen toimittaja Marija Remšujeva kerto nuorilla vierahilla "Periodikan" kanšalliskielisistä painokšista.
Kipinä-kuvalehen piätoimittaja Jana Filimonkova ta toimittaja Ol’ga Dubitskaja vietettih työpaja, missä opaššettih lapšie luatimah Kipinä-kuvalehtie.
– "Kipinän" toimitukšešša on yhekšän ruatajua. Piätoimittaja johtau ta tarkaštau kaikkie. Kielitoimittajat vaššatah kieleštä. A taitotoimittaja antau tehtävie taiteilijilla. Taiteilijat luajitah kuvitukšie ta taitotoimittaja kaunehešti panou niitä šivuh, kerto Jana Filimonkova.
Lapšet jakauvuttih kahteh joukkoh. Heijän piti kerätä nellä ošua yhteh tekstih, ymmärtyä šitä, kekšie nimi, lisätä kuvitukšie ta panna šitä kahella šivulla.
Šiitä Oma Mua -lehen toimittaja Margarita Kemppainen mukavašti kerto koululaisilla keškiaikasešta karjalaisešta puvušta, jokapäiväseštä elämäštä ta esinehistä. Nuoret vierahat iče paššauteltih vanhoja pukuja ta košettih eri vehkehie.
– Keškiaikasissa vuatteissa käytettih luonnonvärijä, vet ei ollun tevollisutta. Värityšainehina käytettih šitä, mitä kašvo mečäššä: marjua, juurie, kuorta ta šammalta. Työ voitta iče ottua kankašpala ta viettyä eksperimentti, šano Margarita Seppovna.
Tulovaisuon johtajat -ammattileiri vietettih Petroskoin 2. koulun tiloissa šajekuun 26.–30. päivinä. Šiih ošallistu 3.–6. luokkien opaštujie. Leiri oli šuunnattu johtajan puolien ta sosialiaktiivisuon kehittämiseh.
"Periodikan" työpajat oltih vain ošana monipuolisešta ohjelmašta. Viiješšä päiväššä ošallistujat tutuššuttih volont’oritoimintah eri aloilla, kačottih Starina kavotetušta ajašta -filmi, pelattih urheilupelilöih, ruattih koulun mediastudijošša. Šamoin lapšet tutuššuttih LizaAlert-ečintäjoukon työh ta äšen šuatih tietyä Venäjän kanšojen čäijyperintehistä. Viime päivänä koululaiset käytih Vodlajärven kanšallispuiston vierailukeškukšešša, a lopušša juhlallisešti šuatih kunnivokirjoja, sertifikattija ta lahjoja.
