Тексты
Вернуться к списку
| редактировать | удалить | Создать новый
| Статистика
| ? Помощь
Mehed L’udmila.
Kakši luatikkuo lämpyö ta huolenpituo
Источник:
Oma mua. 2026. 04.11 (№ 43 (1833)). С. 8
Mehed L’udmila
Kakši luatikkuo lämpyö ta huolenpituo
карельский: собственно карельское наречие
Новописьменный севернокарельский
Koštamukšen šeiččemešluokkalaiset uuvveštah autettih 30. rykmentin šotilahie.
Šykyšy on jo loppupuolella, ta etulinjan puoluštajat kuin enneinki hyvin tarvitah kannatušta. Koštamukšen gimnasijan 7B-luokan opaštujat ei jiäty šivuh. Hyö yheššä vanhempieh ta luokanopaštajan Natalja Juhnevičin kera ošallissuttih humanitarisen avun keräykšeh 30. rykmentillä Kurskin alovehella. Aktijon järješti Karjalan šielun lämpö -ryhmä.
Koululaiset kerättih kaikista tarvittavie vehkehie: lämpimie vuatteita, gigienituottehie ta pitän šäilyttämisen einehie. Jokahini ošallistu omien voimien mukah – yhet tuotih šukkie, toiset oššettih šavotettuo maituo ta hauvottuo lihua, kolmannet annettih lämpimie alušvuatteita ta nellännet lahjotettih luatikko čäijyö tahi makijaisie. Šemmosih aktijoih ošallistumisešta tuli luokalla hyvä perinneh: tämä on kolmaš vuosi peräkkäh, kun opaštujat autetah šotilahie. Viime opaššušvuotena koululaiset šuatih kiitoškirjani etulinjašta.
Ei ainuoštah lapšet, ka i heijän luokanopaštaja niise aktiivisešti yhtyy keräykših. Natalja Ivanovna monta kertua henkilökohtasešti autto šotilahie ta kešällä ošallistu avuššuškeräytymisih.
– Äšen pieni panoš voit olla erittäin merkittävä, ta meijän pieni apu on šuurena tukena puoluštajilla, on varma luokanopaštaja.
Avušta etulinjan šotilahilla koululaisie ta heijän opaštajua kiitti Karjalan šielun lämpö -ryhmän johtaja:
– Šyvämellini passipo Koštamukšen gimnasijan 7B-luokan vanhemmilla ta opaštujilla! Šain tällä netälillä heiltä apuo meijän šotilahilla. Hyö huolekkahašti kerättih lämpimie vuatteita, liäkkeitä, makijaisie, kahvie, šavotettuo maituo ta čäijyö. Opaštujat, vanhemmat ta heijän luokanopaštaja Natalja Juhnevič aina vaššatah avuššuškeräykših. Kakši luatikkuo lämpyö ta huolenpituo lähetäh lämmittämäh ta ilahuttamah meijän puoluštajie. Vain yheššä myö voitamma!
