Тексты
Вернуться к списку
| редактировать | удалить | Создать новый
| Статистика
| ? Помощь
Сидоркин Валерий.
Festivali keräsi yštävie
Источник:
Oma mua. 2026. 11.11 (№ 44 (1834)). С. 2
Сидоркин Валерий
Festivali keräsi yštävie
карельский: собственно карельское наречие
Новописьменный севернокарельский
Šajekuun lopušša ta pimiekuun alušša Joškar-Olašša ta šiitä Petroskoissa mäni Šuomelais-ugrilaini läpikulku -festivali.
Tilaisuš yhisti eksperttijä šuomelais-ugrilaisien kanšojen taijon ta kulttuurin alalla, luovie kollektiivija Moskovašta, Joškar-Olašta, Petroskoista ta Karjalan kahešta piiristä, Piiteristä, Iževskistä šekä Donetskin ta Luganskin kanšantašavalloista ta Krimin tašavallašta.
Petroskoissa festivalin enšimmäisenä päivänä tilaisuot mäntih Petrovskii-kulttuurikeškukšešša. Šielä vietettih musejo- ta kirjallisušlaboratorija nimeltä "Karjalaisien perintehien šäilyttäjät".
Festivalin piätapahtumat piettih toisena päivänä kaupunkin eri tiloissa. Ne avauvuttih Karjalan tašavallan kanšallisešša musejošša, missä vietettih luventoja Venäjän šuomelais-ugrilaisien kanšojen luovien projektien kehitykšeštä, Karjalan perintehellisistä pukuloista 1800–1900-luvulla šekä Tanššimaini Karjala -projektin toteuttamisešta. Videoyhteyven kautti festivalin ošallistujat tutuššuttih festivali- ta kulttuuritoimintah Donbassissa ta Luganskin alovehella.
Toisen päivän illalla Karjalan tašavallan musiikkiteatterissa järješšettih Šuomelais-ugrilaini läpikulku -festivalin šuuri konsertti. Šiih ošallissuttih Karjalan kanšallisen laulun ta tanššin Kantele-yhtyveh ta tašavallan kanšanšoittimien orkesteri, Skylark-folkryhmä ta Karjalan kulttuuri- ta taitokolledžin horeografini ošašto, Solo-vokalistudijo, Metamorfozi-nykytanššiteatteri ta lapšien Vesläžed-folkloriyhtyveh šekä Šoutjärven vepšäläini kanšankuoro ta Verejakanšanlauluyhtyveh Sortavalašta.
Festivalin viimesenä päivänä šen ošallistujilla toisista kaupunkiloista piettih autobuššiekskursijo Petroskoin merkittävie paikkoja myöten. Toimenpivon järještäjien šuunnitelmissa on leventyä šen toiminnan muantiijollisie rajoja, erityisešti kuččuo kollektiivija Valko-Venäjän tašavallašta ta uuvveštah šuaha kanšainvälisen festivalin statussi.
– Šemmoset matat ollah hyvin tärkiet, ne autetah tuttavuštuo kollegojen toimintah toisilla alovehilla, nähä kehitykšen uušie šuuntoja ta vaihtua kokemušta. Passipo mahollisuošta šuaha tietyä äijän uutta, korošti Julija Možn’akova, festivalin ošallistuja Luganskin kanšantaijon keškukšešta.
Šuomelais-ugrilaini läpikulku -festivalin peruštajana on Venäjän kulttuuriministerijö. Järještäjinä ollah Roskonsert-luovaliitto, Venäjän V.D. Polenovilla nimitetty kanšantaijon talo, Karjalan kulttuuriministerijö, Mari Elin kulttuurin, lehtien ta kanšallisukšien aseijen ministerijö ta kanšantaijon talo šekä Karjalan tašavallan kanšantaijon ta kulttuurialottehien keškuš. Projektin partn’orina on Venäjän šuomelais-ugrilaisien kanšojen liitto.
