Тексты
Вернуться к списку
| редактировать | удалить | Создать новый
| Статистика
| ? Помощь
Marija Kirillova.
Karjala liitty Šuureh etnografiseh šaneluh
Источник:
Oma mua. 2026. 11.11 (№ 44 (1834)). С. 2
Marija Kirillova
Karjala liitty Šuureh etnografiseh šaneluh
карельский: собственно карельское наречие
Новописьменный севернокарельский
Pimiekuun 3.–12. päivinä Venäjällä ta šen ulkopuolella mäni luaja Šuuri etnografini šanelu -šivissyšaktijo.
Pimiekuun 3. päivänä Karjala liitty Šuuri etnografini šanelu -aktijoh, kumpani mäni Karjalan kanšojen yštävyštalošša. Tänä vuotena tilaisuoh ošallistu 73 henkie. Ošallistujien luvušša oli ylioppilahie, tieto- ta kulttuurilaitokšien etuštajie, yhteiskunnallisien liittojen jäšenie, tiijotušvälinehien ruatajie. Šamoin šaneluh liitty 11 šotilašta, ket palvellah Petroskoin lentorykmentissä.
Tilasuon avajaiset kaunisti lapšien Petrovskaja sloboda -folklorikollektiivin esityš.
– Tänä vuotena aktijo on simvolini: šitä vietetäh Venäjän kanšojen yhtenäisyön vuotena. Šen tarkotukšena on koroštua, jotta meijän muan voima on eri kulttuurien yhtymiseššä ta keškenäiseššä šuivaičennašša. Šuurešta etnografisešta šanelušta tulou ei ainuoštah šivissyšaloteh, vain tärkie yhteiskunnallini tapahtuma, kumpani yhistäy ihmisie rippumatta kanšallisuošta, ijäštä ta elinpaikašta, korošti Karjalan tašavallan kanšallisen ta alovehellisen politiikan ministerijön ošašton johtaja Jelena Migunova.
Šanelun kyšymykšet ta vaštaukšien variantit luvettih Karjalan Rahvahan Liiton johtaja Anna Jakovleva ta Kvartalkanšallisjärještön johtaja Mihail Tretjakov.
– Šuuri etnografini šanelu on hyvä mahollisuš šuaha enemmän tietoja meijän kantatuattojen perintehistä ta ihmisistä, kumpaset eletäh meijän rinnalla, šano Anna Jakovleva.
Šanelun ošallistujilla oli 45 minuuttie, jotta vaššata 30 kyšymykšeh, kumpaset košettih Venäjän kanšojen perintehie, tunnettuja ihmisie, uškontuo, kulttuurie ta istorijua.
Perintehen mukah aktijon yhtehvevot luajitah 12. talvikuuta 2026, Venäjän Perušlajin päivänä.
