Тексты
Вернуться к списку | редактировать | удалить | Создать новый | История изменений | Статистика | ? Помощь
Pustpä Annoi
Pustpä Annoi
вепсский
Младописьменный вепсский
– Annoi , mijak
svatuid-se hül’gaižid ? Kenak sindai mehele otaškab ?
– A minä uniš nägin , miše lidnaspäi priha tuleb , veraz , ei meiden malpäi i otab mindai mehele .
– Ed-ik princad varasta ? Mod sinai čoma om , voib olda , ken-se i utniše , a naku mel’t päs om sinai vähakh !
Annoi muhahtab venol muhul da i lähteb laptaha .Rahvaz-žо nägi , miše radab hän vaiše tühjid radoid , ei ližatomid .Naku toi hän rugižtähthid i ištuti pertinnoks .Mamoi lajiškanzi :
– Ka ken melekaz ristit man kaivab sen täht , miše jäl’ges rujoheinid pertinnoks ištutada ?Susedoid jo huiged om , pustaks päks sindai lugedas .
– Nu ka i mida ? Verаst sud ed saupta , pagištas , pagištas dai heittäs-ki , a rugižtähthad ihastust andaba , kacta niihe om hüvä mel’ …Mamoi , minä tahtoižin kuzuden ištutada pordhidennoks , korktan , tihedan .Kazvaiži se sureks , oiktaks , linniži kaiken vihand i ei vanhtuiži nikonz !
– Ka ei ištutagoi pertinnoks puid , jured pertin alle kazvaba , dai völ päiväižen pimitab . Muite-ki päiväšt vähä om !Iknaha öl ku kacuhtad , ka kaiken varu linneb , ved’ miku bukačuine must seižuškab , pimedas pöl’göitab .
Muhahti Annoi i mäni radole , a sügüzel toi kuzuden i ištuti čogaha linmale , pohjasižele polele , miše kuvahaine semendusile ei lankteiž , a pohjasine paha tullei oksihe putuiž .Kuzut tartui , i kevädel vihoštaškanzi uzil neglaižil , ladv kazvoi mugoine korged i čomakaz , mišto mamale žal’ tegihe restta nor’ vihand puhut .
– Okha kazvab ! Min sä teged , ku laps’ om pustpä !
I kuz’ zavodi napernas kazda i otta väged i čomut .
… Kut -se küläha tuliba geologad , Annoihe mel’düi priha i oti mehele , vei Annoin surehe lidnaha verhale male . Kaik läksi muga , kut konz-se uni ozuti .Vaiše se oli huba , miše tusttui Annoi kodid lujas .Čoma oli mužik , hüväd kazvoiba lapsed , a aigoil kingiti rindhad muga , mišto voiži , ka lendaiži lindun karččikš kodirandale , ištuižihe kuzen ladvale i male i taivhale voikaiži pahan , rastajan tuskan …
Nügüd’-ki völ seižub se kuz’ kesk vauvast koivištod , korged ladv miku kacub , ecib ičeze kazvatajan , da vaiše ei ole jo Annoid necil svetal .Amu venub hän ledos mahudes , a kuzen jured süväs i vahvas pidäsoi tatoiden mas .
Naku ningoman jäl’gen jäti Annoi !I tahtoin küzuda minä lugijoil : oli-k Annoi pustpä ?..
Pustpä Annoi
вепсский
Младописьменный вепсский
–